جنوبی افریقہ کی ٹیم نے آئی سی سی ون ڈے ورلڈ کپ 2023 میں سب سے زیادہ چھکے مارنے والی ٹیم کا اعزاز اپنے نام کر لیا۔

تفصیلات کے مطابق آج پونے میں ہونے والے میچ میں جنوبی افریقہ کی ٹیم نے نیوزی لینڈ کے خلاف ورلڈ کپ کے 32 ویں میچ میں سب سے زیادہ چھکے مارنے کا منفرد ریکارڈ اپنے نام کر لیا۔

بھارت کے شہر پونے میں ہونے والے آئی سی سی ون ڈے ورلڈ کپ میں نیوزی لینڈ نے ٹاس جیت کر جنوبی افریقہ کو پہلے بیٹنگ کی دعوت دی۔

جنوبی افریقہ نے مقررہ 50 اوورز میں 4 وکٹوں کے نقصان پر 357 رنز بنائے۔

پروٹیز اوپنر کوئنٹن ڈی کوک 116 گیندوں پر 114 رنز کی اننگ کھیلی جس میں 3 چھکے شامل تھے، جبکہ وینڈر ڈوس 118 گیندوں پر 133 رنز کی اننگ میں 5 چھکے شامل تھے۔

جنوبی افریقن کپتان ٹیمبا باؤما نے بھی 24 رنز کی اننگ میں 1 چھکا لگایا۔

جبکہ 53 رنز کی اننگ کھیلنے والے ڈیوڈ ملر نے 4 چھکے لگائے، ہینرچ کلاسن اور ایڈن مارکرام نے بھی ایک ایک چھکا لگایا۔

جنوبی افریقہ کی اننگ میں پروٹیز بلے بازوں نے مجموعی طور پر 13 چھکے لگائے۔

آئی سی سی ون ڈے ورلڈ کپ کی تاریخ میں جنوبی افریقہ واحد ٹیم ہے جس نے 2023 کے عالمی ایونٹ کے 7 میچوں میں 82 چھکے لگا کر ورلڈ کپ کا نیا ریکارڈ قائم کر دیا ہے۔

یاد رہے کہ اس سے قبل یہ منفرد ریکارڈ انگلینڈ کے پاس تھا جو اس نے 2019 کے ورلڈ کپ میں بنایا تھا، انگلینڈ کے بلے بازوں نے اس ورلڈ کپ میں مجموعی طور پر 76 چھکے لگائے تھے۔

واضح رہے کہ آج نیوزی لینڈ کے خلاف میچ کے بعد جنوبی افریقہ کو مزید 2 گروپ میچز کھیلنا ہے، اور توقع ہے کہ پروٹیز بلے باز اس ریکارڈ کو مزید بہتر بنائیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/11/174899/amp/ کو لائک کریں