قومی ٹیم کے کپتان بابراعظم آئی سی سی ون ڈے رینکنگ میں ڈھائی سال نمبرون  پر رہنے کے بعد اپنی پوزیشن کھو بیٹھے جب کہ شاہین آفریدی بھی نمبر ون سے نیچے آگئے ہیں۔ 

انٹرنیشنل کرکٹ کونسل (آئی سی سی) نے ون ڈے کی پلیئرز رینکنگ جاری کردی جس میں قومی ٹیم کے کپتان بابراعظم سے نمبر ون پوزیشن چھن گئی ہے، وہ اب دوسرے نمبر پر چلے گئے جب کہ ان کی جگہ اب بھارتی اوپننگ بلے باز شبمن گل پہلی پوزیشن پر قابض ہوگئے ہیں۔

بابر اعظم لگ بھگ ڈھائی برس نمبر ون کی پوزیشن پر رہے لیکن اب بھارتی نوجوان بلے باز شبمن گل کے 830 رینکنگ پوائنٹس ہو گئے ہیں جب کہ بابر اعظم 824 رینکنگ پوائنٹس کے ساتھ دوسرے نمبر پر ہیں۔

ون ڈے رینکنگ میں جنوبی افریقا کے کوئنٹن ڈی کوک تیسرے، بھارت کے ویرات کوہلی چوتھے اور آسٹریلیا کے ڈیوڈ وارنر پانچویں نمبر پر ہیں۔ اس کے علاوہ پاکستان کے فخر زمان ہفتہ وار رینکنگ میں 11 ویں نمبر موجود ہیں جب کہ افغانستان کے ابراہیم زادران سات درجے بہتری کے ساتھ 12 ویں نمبر پر آگئے۔

ون ڈے بولرز رینکنگ:

آئی سی سی ون ڈے رینکنگ میں پاکستانی اسٹار بولر شاہین شاہ آفریدی بھی اپنی نمبر ون پوزیشن کھو بیٹھے، وہ پورا ایک ہفتہ اس پوزیشن پر رہے۔

اب بھارت کے محمد سراج 709 پوائنٹس کے ساتھ پہلے نمبر پر ہیں، جب کہ جنوبی افریقا کے کیشوو مہاراج 694 پوائنٹس کے ساتھ دوسرے، آسٹریلیا کے ایڈم زمپا 662 پوائنٹس کے ساتھ تیسرے نمبر پر ہیں۔

بھارت کے کلدیپ یادیو 661 پوائنٹس کے ساتھ چوتھے اور پاکستان کے شاہین شاہ آفریدی 658 پوائنٹس کے ساتھ پانچویں نمبر پر موجود ہیں۔

آل راؤنڈر رینکنگ:

آئی سی سی آل راؤنڈرز رینکنگ میں بنگلادیش کے کپتان شکیب الحسن پہلے، افغانستان کے محمد نبی دوسرے، زمبابوے کے سکندر رضا تیسرے نمبر پر ہیں۔ اس کے علاوہ افغانستان کے راشد خان کا چوتھا نمبر ہے۔