غزہ میں الجزیرہ نیوز کے براڈکاسٹ انجنیئر نے اپنے خاندان کے 19 افراد کو اسرائیلی فضائی حملے میں کھو دیا ہے۔

عالمی خبر رساں ادارے کی خبر کے مطابق غزہ میں الجزیرہ کے بیورو کے براڈکاسٹ انجینئر محمد ابو القمسان نے جبالیہ پناہ گزین کیمپ پر اسرائیلی فضائی حملوں میں اپنے والد اور دو بہنوں سمیت خاندان کے 19 افراد کو کھو دیا ہے۔

الجزیرہ نے جبالیہ پناہ گزین کیمپ پر اسرائیلی حملے کی مذمت کی ہے جس میں براڈکاسٹ انجینئر محمد ابو القمسان کے اہل خانہ ہلاک ہو گئے تھے۔

منگل کے روز الجزیرہ نے ایک بیان میں اسرائیلی افواج کی جانب سے قتل عام اور ناقابل معافی عمل کی مذمت کی ہے۔

الجزیرہ کی جانب سے جاری بیان میں کہا گیا ہے کہ الجزیرہ اس گھناؤنی اور اندھا دھند اسرائیلی بمباری کی شدید مذمت کرتا ہے جس کے نتیجے میں ایس این جی انجینئر محمد ابو القمسان کے اہل خانہ کے 19 افراد ہلاک ہوگئے۔

جبالیہ قتل عام کے دوران اس ناقابل معافی فعل نے محمد ابو القسان کے والد ، دو بہنوں، آٹھ بھتیجے اور بھتیجیوں، اس کے بھائی، اس کے بھائی کی بیوی اور ان کے چار بچوں، اس کی بھابھی اور ایک چچا کی جان لے لی۔

یہ المیہ ایسے وقت میں سامنے آیا ہے جب محصور غزہ کی پٹی پر اسرائیل کی مسلسل بمباری جاری ہے، جہاں 2.3 ملین سے زائد فلسطینیوں کے پاس محفوظ پناہ گاہوں کے لیے بہت کم آپشنز ہیں۔

اسرائیلی بمباری میں اب تک 31 صحافی بھی اپنی جان سے ہاتھ دھو بیٹھے ہیں، جبکہ وحشیانہ بمباری کے نتیجے میں 8 ہزار سے زائد فلسطینی شہید ہو چکے ہیں۔

فلسطینی حکام کے مطابق اسرائیل نے شمالی غزہ کے علاقے جبالیہ پناہ گزین کیمپ پر حملہ کیا جس کے نتیجے میں 50 سے زائد افراد ہلاک ہو گئے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/11/393254/amp/ کو لائک کریں