چیف جسٹس پاکستان جسٹس قاضی فائزعیسٰی نے سابق صدرپرویز مشرف کی سزا کے خلاف اپیل سماعت کے لیے منظورکرتے ہوئے حکمنامہ لکھوا دیا۔

چیف جسٹس پاکستان جسٹس قاضٰی فائزعیسٰی کی سربراہی میں چاررکنی لارجر بینچ نے سماعت کی، بینچ میں جسٹس منصورعلی شاہ، جسٹس امین الدین، جسٹس اطہر من اللہ شامل تھے۔

عدالتِ عظمٰی نے حکم  نامے میں کہا کہ مشرف کے وکیل نے بتایا کہ اپیل پررجسٹرار نے اعتراض لگایا تھا، وکیل نے بتایا کہ اعتراض کے خلاف اپیل سابق چیف جسٹس عمرعطا بندیال کے چیمبرمیں مقرر ہوئی، وکیل نے بتایا کہ چیمبرسے جج نے کیس لارجر بینچ میں لگانے کا کہا۔ وکیل نے بتایا اس کے بعد کیس مقرر نہیں ہوا اور مشرف کی وفات ہو گئی۔

حکم نامےمیں کہا گیا کہ مشرف کے وکیل نے کہا کہ آئین پاکستان بھی اپیل کا حق دینے کی بات کرتا ہے، کیس میں تمام فریقین سے پوچھا گیا کہ مشرف کی اپیل کو مقرر کرنے پر کسی کو اعتراض تو نہیں، ایڈیشنل اٹارنی جنرل سمیت کسی فریق نے اعتراض نہیں اٹھایا، افسوس ناک ہے کہ چیمبر میں جج کے حکم کے باوجود اپیل آج تک مقررنہیں ہوئی، اپیل کنندہ یا اس کے وکیل کو اپیل مقرر نہ ہونے پر ذمہ دارنہیں کہا جا سکتا.

چیف جسٹس پاکستان نے حکم نامہ لکھوایا کہ کسی کو بھی عدالت کے کنڈکٹ کا خمیازہ نہیں بھگتا چاہیے، اپیل کسی کی بھی سزا یافتہ شخص کا حق ہے، پرویزمشرف کی اپیل کو سماعت کیلئے مقررکرنے کی متفرق درخواستیں منظور کی جاتی ہیں اور رجسٹرار آفس کو پرویز مشرف کی سزا کے خلاف اپیل کو نمبر لگا کر مقررکرنے کی ہدایت بھی۔

سپریم کورٹ نے لاہورہائیکورٹ کے فیصلہ کے خلاف اپیلیں بھی سماعت کیلئے منظور کر لیں اوررجسٹرار آفس کو لاہور ہائیکورٹ فیصلے کے خلاف اپیلیں نمبر لگا کر مقرر کرنے کی ہدایت کرتے ہوئے کہا کہ آئندہ سماعت اگلے جمعہ کو رکھ لیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/11/717459/amp/ کو لائک کریں۔

ٹوئٹر پر ہمیں فالو کریں https://www.bolnews.com/urdu/latest/2023/11/717459/amp/ اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔