پریزیڈنٹ ٹرافی گریڈ ون کرکٹ ٹورنامنٹ میں اسٹیٹ بینک نے پی ٹی وی کو دس وکٹوں سے ہرا دیا

تفصیلاے کے مطابق اسٹیٹ بینک اسپورٹس کمپلیکس میں کھیلے گئے میچ کے تیسرے دن پی ٹی وی کی ٹیم اپنی دوسری اننگز میں 339  رنز بناکر آؤٹ ہوگئی۔

فاسٹ بولر محمد عباس کی عمدہ کارکردگی نے اسٹیٹ بینک کو پی ٹی وی کے خلاف دس وکٹوں سے کامیابی دلا دی۔

پہلی اننگز میں 66 رنز پر آؤٹ ہونے کے بعد دوسری اننگز میں  پی ٹی وی نے بہتر کارکردگی دکھائی۔

پی ٹی وی کی جانب سے حسن محسن نے چودہ چوکوں اور دو چھکوں کی مدد سے 96 رنز بنائے۔ حسن نواز نے 83 اور تیمور خان 62 رنز کی اننگ کھیلی۔

محمد عباس نے پہلی اننگز میں 19 رنز دے کر 6 وکٹیں حاصل کی تھیں، جبکہ دوسری اننگ میں 103 رنز دے کر 4 کھلاڑیوں کا شکار کیا، محمد عباس نے مجموعی طور پر میچ میں 10 وکٹیں حاصل کیں۔

محمد عباس نے 12 ویں مرتبہ کسی فرسٹ کلاس میچ میں دس وکٹیں حاصل کی ہیں، اس میچ کے بعد فرسٹ کلاس کرکٹ میں ان کی وکٹوں کی تعداد 670 ہو گئی ہے۔

پریذیڈنٹ ٹرافی گریڈ ون کرکٹ ٹورنامنٹ کے دوسرے میچ میں واپڈا نے کے آر ایل کو 48 رنز سے ہرادیا، واپڈا نے کے آر ایل کو جیتنے کے لیے 287 رنز کا ہدف دیا تھا۔

تیسرے دن کھیل ختم ہونے پر کے آر ایل نے ایک وکٹ کے نقصان پر 39 رنز  بنائے تھے۔

چوتھے دن کے آر ایل کی ٹیم 238 رنز بناکر آؤٹ ہوگئی، سرمد بھٹی 6 چوکوں کی مدد سے 60 رنز بنا کر ٹاپ اسکورر رہے اور عبدالفصیح نے 6 چوکوں اور 1 چھکے کی مدد سے 43 رنز بنائے۔

آصف آفریدی نے 64 رنز دے کر 4 وکٹیں حاصل کیں، انہوں نے پہلی اننگز میں بھی عمدہ بولنگ کرتے ہوئے 81 رنز دے کر 4 کھلاڑیوں کو آؤٹ کیا تھا۔

نیشنل بینک اسٹیڈیم میں ایس این جی پی ایل اور غنی گلاس کے درمیان میچ ڈرا ہوگیا، غنی گلاس کو میچ جیتنے کے لیے 409 رنز کا ہدف ملا تھا۔

میچ کے چوتھے اور آخری دن غنی گلاس نے دوسری اننگز 38 رنز دو کھلاڑی آؤٹ پر شروع کی اور 6 وکٹوں پر 300 رنز بنائے۔

سعد نسیم نے 9 چوکوں اور 4 چھکوں کی مدد سے 105 رنز بنائے اور ناٹ آؤٹ رہے، طیب طاہر نے سات چوکوں کی مدد سے 60 رنز اسکور کیے، کاشف علی نے دس چوکوں کی مدد سے 59 رنز کی اننگز کھیلی۔

محمد عرفان نے 55 رنز بنائے جس میں پانچ چوکے اور ایک چھکا شامل تھا۔

محمد علی نے 86 رنز دے کر 4 وکٹیں حاصل کیں۔

پریذیڈنٹ ٹرافی کا دوسرا راؤنڈ 22 دسمبر کو شروع ہوگا، جس میں کے آر ایل کا مقابلہ غنی گلاس سے اسٹیٹ بینک اسٹیڈیم میں ہوگا۔

واپڈا اور ہائر ایجوکیشن کمیشن کی ٹیمیں نیشنل بینک اسٹیڈیم میں مدمقابل ہونگی

جبکہ ایس این جی پی ایل اور پی ٹی وی کے درمیان میچ یو بی ایل اسپورٹس کمپلیکس میں کھیلا جائے گا۔