جی ڈی اے کی جانب سے سندھ سے رکن الیکشن کمیشن نثار درانی پر شدید تحفظات کا اظہار کیا گیا ہے۔

ترجمان جی ڈی اے سائرہ بانو نے اس حوالے سے ایک ویڈیو بیان جاری کیا جس میں انہوں نے کہا کہ  نثار درانی لاء ایسوسی ایٹ کی رکن صائمہ آغا کو پیپلز پارٹی نے مخصوص نشست پر امیدوار نامزد کردیا۔

جی ڈی اے ترجمان سائرہ بانو نے کہا کہ صائمہ آغا کو سندھ سے خواتین کی مخصوص نشستوں پر نامزد کیا گیا ہے، یہ مفادات کا ٹکراو اور الیکشن کی شفافیت پر سنگین سوالات ہیں، ہمیں چیف الیکشن کمشنر کی شفاف اور غیر جانبدار الیکشن کروانے کی یقین دہانی پر مکمل اعتماد ہے۔

سائرہ بانو کا کہنا تھا کہ سندھ میں جی ڈی اے سمیت کئی سیاسی جماعتوں کو نثار درانی پر تحفظات ہیں، ان کا جھکاؤ ایک مخصوص سیاسی جماعت کی طرف ہے، کس حیثیت میں ان کی ایسوسی ایٹ کو پیپلز پارٹی نے ٹکٹ سے نوازا۔

انہوں نے مزید کہا کہ اس قسم کے اقدامات سے الیکشن کی شفافیت پر سوالات اٹھیں گے، صرف نثار درانی کی ہی قریبی عزیزہ کو پیپلز پارٹی نے کیوں نامزد کیا، امید ہے چیف الیکشن کمشنر میرے سوالات کا جواب دینگے اور اس معاملے کی تحقیقات کروائیں گے۔