یوکرینی صدر ولادیمیر زیلنسکی تعطل کا شکار ہونے والی 60 ارب ڈالر کی امریکی فوجی امداد بچانے کے لیے امریکہ پہنچ گئے ہیں۔

برطانوی خبر رساں ادارے کی خبر کے مطابق یوکرین کے صدر ولادیمیر زیلنسکی واشنگٹن ڈی سی جا رہے ہیں تاکہ کیف کو اربوں ڈالر مالیت کے امریکی دفاعی پیکج کو دوبارہ بحال کرایا جا سکے۔

فروری 2022 میں روس کی جانب سے یوکرین پر حملے کے بعد یوکرینی صدر کا یہ تیسرا دورہ امریکہ ہو گا۔

یہ ہفتہ یوکرین کے لئے ایک اہم ہفتہ ہے ، یورپی یونین نے بھی فیصلہ کیا ہے کہ آیا اس بلاک میں اس کی شمولیت پر باضابطہ بات چیت شروع کی جائے یا نہیں۔

ہنگری کے وزیر اعظم وکٹر اوربان نے اشارہ دیا ہے کہ وہ اس اقدام کی مخالفت کرتے ہیں، اور اس طرح کے فیصلے کو روکنے کا اختیار رکھتے ہیں.

وکٹر اوربان اور ولادیمیر زیلنسکی نے گزشتہ روز ارجنٹائن کے نئے صدر کی حلف برداری کے موقع پر ملاقات کی تھی تاہم ان کی گفتگو کی تفصیلات سامنے نہیں آئیں۔

یوکرین کے صدر آج واشنگٹن پہنچیں گے۔ امریکی صدر جو بائیڈن اور ری پبلکن ایوان نمائندگان کے اسپیکر مائیک جانسن سے ملاقاتوں کے علاوہ وہ منگل کی صبح سینیٹ سے خطاب بھی کریں گے۔

وائٹ ہاؤس نے اتوار کے روز ایک بیان میں کہا کہ زیلنسکی کے دورے کا مقصد یوکرین کے عوام کی حمایت کے لیے امریکہ کے غیر متزلزل عزم کو اجاگر کرنا ہے کیونکہ وہ روس کے وحشیانہ حملے کے خلاف اپنا دفاع کر رہے ہیں۔

60 ارب ڈالر مالیت کا فوجی امدادی پیکج اس وقت کانگریس میں تعطل کا شکار ہے جسے ریپبلکنز کی جانب سے دباؤ کا سامنا ہے جن کا کہنا ہے کہ مزید رقم امریکہ اور میکسیکو کی سرحد پر داخلی سلامتی کے لیے خرچ کی جانی چاہیے۔

گزشتہ ہفتے سینیٹ میں ہونے والی ووٹنگ میں ایک پیکج کو روک دیا گیا تھا، جس میں یوکرین کی فنڈنگ بھی شامل تھی۔

امریکی صدر جو بائیڈن قانون سازوں پر زور دے رہے ہیں کہ وہ فنڈز کی منظوری دیں۔

گزشتہ بدھ کو ٹیلی ویژن پر اپنے جذباتی خطاب میں جو بائیڈن نے کہا تھا کہ یہ پیکج انتظار نہیں کر سکتا اور خبردار کیا کہ روس یوکرین پر فتح حاصل کرنے سے باز نہیں آئے گا۔

اگرچہ یوکرین نے روس کے اصل حملے کو ناکام بنا دیا تھا، لیکن اس سال اس کا جوابی حملہ رک گیا ہے اور کچھ مغربی ممالک کی جانب سے تھکاوٹ کے آثار نظر آرہے ہیں جنہوں نے فوجی طور پر اس کی حمایت کی ہے۔

سینیٹ میں ووٹنگ کے بعد یوکرین کی خاتون اول اولینا زیلینسکا نے برطانوی نشریاتی ادارے کے ایک پروگرام میں بتایا کہ اگر مغربی ممالک نے ان کی حمایت جاری نہ رکھی تو یوکرین کے عوام جان لیوا خطرے میں پڑ جائیں گے۔