عدالت نے معروف کرکٹر کو جنسی جبر کے الزام میں مجرم قرار دے دیا ہے، ان کے خلاف فیصلہ بعد میں دیا جائے گا۔

کرکٹ کی معروف ویب سائٹ کے مطابق کھٹمنڈو ڈسٹرکٹ کورٹ کے سنگل جج بنچ نے اتوار کو شروع ہونے والی سماعت کے بعد سندیپ لامیچانے کو جنسی جرم کا مجرم قرار دیا ہے۔

حالانکہ، عدالت اس نتیجے پر پہنچی ہے کہ واقعہ کے وقت متاثرہ لڑکی نابالغ نہیں تھی، جیسا کہ پہلے بتایا گیا تھا۔ اس معاملے پر اگلی سماعت سندیپ لامیچانے کی سزا کا فیصلہ کرے گی۔ سندیپ لامیچانے فی الحال ضمانت پر باہر ہیں۔

جمعہ کے روز سندیپ لامیچانے کی قیادت میں پارسا کلب الیون نے بیر گنج میں نیپال پرو کلب چیمپیئن شپ کے میچ میں نیپال آرمی کلب کو شکست دی تھی۔

گزشتہ سال ستمبر کے اوائل میں اس وقت کے نیپالی کپتان سندیپ لامیچانے کو کرکٹ ایسوسی ایشن آف نیپال (سی اے این) نے اس معاملے پر کھٹمنڈو میں ان کے خلاف گرفتاری وارنٹ جاری ہونے کے بعد معطل کر دیا تھا۔

یہ اس خبر کے بعد ہوا کہ سندیپ لامیچانے کے خلاف کٹھمنڈو پولیس اسٹیشن میں شکایت درج کرائی گئی ہے۔

اس وقت سندیپ لامیچانے ویسٹ انڈیز میں تھے اور جمیکا تلاوہ سی پی ایل 2022 میں حصہ لے رہے تھے۔ کلب نے اعلان کیا ہے کہ سندیپ لامیچانے فوری طور پر ٹورنامنٹ چھوڑ دیں گے۔

اکتوبر کے اوائل میں ویسٹ انڈیز سے واپس آتے ہوئے کھٹمنڈو کے ہوائی اڈے پر اترنے کے بعد سندیپ لامیچانے کو حراست میں لے لیا گیا تھا۔

گرفتاری سے کچھ دیر قبل سندیپ لامیچانے نے فیس بک پر لکھا تھا کہ وہ ‘تحقیقات کے تمام مراحل میں مکمل تعاون کریں گے اور اپنی بے گناہی ثابت کرنے کے لیے قانونی جنگ لڑیں گے اور اسے سازش اور غلط الزام قرار دیا تھا۔

سندیپ لامیچانے نے رواں سال فروری میں نمیبیا اور اسکاٹ لینڈ کے خلاف ہوم گراؤنڈ پر کرکٹ ورلڈ کپ لیگ ٹو سہ فریقی سیریز کے لیے نیپال کی ٹیم میں واپسی کی تھی، جہاں مخالف ٹیموں کے کسی بھی کھلاڑی نے کسی بھی مرحلے پر ان سے ہاتھ نہیں ملایا تھا۔

اس کے بعد انہیں 2023 کے اوائل میں دبئی میں ہونے والی کرکٹ ورلڈ کپ لیگ 2 سہ فریقی سیریز کے لئے نیپالی اسکواڈ میں شامل کرنے پر غور نہیں کیا گیا تھا، لیکن بعد میں انجری کے متبادل کے طور پر ٹیم میں شامل ہوگئے تھے۔

سندیپ لامیچانےاس کے بعد سے نیپال کی نمائندگی جاری رکھے ہوئے ہیں ، جس میں زمبابوے میں ون ڈے ورلڈ کپ کوالیفائر اور ون ڈے ایشیا کپ شامل ہیں۔