ایرانی شخص نے اپنے جسم پر سب سے زیادہ چمچ متوازن رکھنے کا عالمی ریکارڈ بنا ڈالا۔

ایران سے تعلق رکھنے والے 51 سالہ ابوالفضل صابر مختاری نے بغیر قمیض کے اپنے جسم پر کل 88 چمچوں کو متوازن رکھ کر یہ کارنامہ انجام دیا جوکہ اپنی مثال آپ ہے۔

اس سے قبل 2021 میں بھی انہوں نے 85 چمچوں سے یہ ریکارڈ بنایا تھا جواس سال انہوں نے خود ہی توڑ ڈالا۔

ابوالفضل صابر مختاری نے گنیز ورلڈ ریکارڈ کی ٹیم سے گفتگو کرتے ہوئے بتایا کہ انہوں نے اپنی جلد پر اشیاء چپکنے کی صلاحیت کو دیکھتے ہوئے اس منفرد ریکارڈ کو بنانے کا فیصلہ کیاتھا۔

وہ اپنی اس منفرد صلاحیت کی وجہ سے  اپنے جسم سے توانائی کو کسی بھی چیز میں منتقل کرکے اسے زیادہ سے زیادہ دیر تک اپنے جسم سے چپکائے رکھتے ہیں۔

انہوں نے بتایاکہ ان کا یہ ہنر صرف چمچوں تک محدود نہیں ہے، کوئی بھی چیز جس کی سطح متوازن ہو وہ اسے اپنے جسم سے چپکا سکتے ہیں ، جیسے کہ پلاسٹک، شیشہ، پھل، پتھر، لکڑی اور یہاں تک کہ ایک مکمل بالغ انسان بھی۔