دبئی میں ہونے والے آئی پی ایل 2024 کی نیلامی میں آسٹریلوی فاسٹ بالر مچل اسٹارک نے لیگ کی تاریخ کے مہنگے ترین کھلاڑی کا اعزاز حاصل کر لیا ہے۔

تفصیلات کے مطابق دبئی میں ہونے والی آئی پی ایل 2024 کی نیلامی میں آسٹریلوی کھلاڑیوں کا راج رہا، فاسٹ بالر مچل اسٹارک کی کولکتہ نائٹ رائیڈر نے 24.75 کروڑ بھارتی روپے کی بولی لگائی ہے۔

آسٹریلیا کی ورلڈ کپ 2023 کے فاتح کپتان پیٹ کمنز دوسرے نمبر پر رہے جن کی خدمات حاصل کرنے کے لیے سن رائزر حیدرآباد نے 20.40 کروڑ بھارتی روپے کی بولی لگائی ہے۔

آئی پی ایل 2024 کی نیلامی میں نیوزی لینڈ کے بہترین کھلاڑی ڈیرل مچل کا نام بھی شامل ہے، جنہیں ورلڈ کپ میں شاندار کارکردگی کی وجہ سے 14.25 کروڑ بھارتی روپے میں چنئی سپر کنگز نے خرید لیا ہے۔

ویسٹ انڈیز کے تیز گیند باز الجاری جوزف کے لیے زبردست بولی لگائی گئی۔ کولکاتہ نائٹ رائیڈرز، رائل چیلنجرز بنگلورو اور لکھنؤ سپر جائنٹس کے درمیان ویسٹ انڈیز کے فاسٹ بالر الجاری جوزف کو حاصل کرنے کی جنگ دیکھنے میں نظر آئی۔

رائل چیلنجرز بنگلورو نے فاسٹ بالر الجاری جوزف کے لیے 11.50 کروڑ بھارتی روپے خرچ کر دئیے۔

آئی پی ایل نیلامی 2024 میں اس مرتبہ بھارت کی جانب سے فاسٹ بالر ہرشل پٹیل نے اونچی چھلانگ لگائی، انہیں پنجاب کنگز نے 11.75 کروڑ بھارتی روپے میں خریدا۔