پریذیڈنٹ ٹرافی گریڈ ون کرکٹ ٹورنامنٹ کا کراچی میں آج سے باقاعدہ آغاز ہو گیا ہے۔

تفصیلات کے مطابق پریذیڈنٹ ٹرافی گریڈون کرکٹ ٹورنامنٹ کا کراچی میں آج سے باقاعدہ آغاز ہو گیا ہے، آج پہلے روز اسٹیٹ بینک اور پی ٹی وی کے درمیان میچ شروع ہو گیا ہے۔

ٹورنامنٹ کے قواعد وضوابط کے مطابق ہر میچ میں پہلی اننگز کی بیٹنگ 80 اوورز پر مشتمل ہے جبکہ دوسری اننگز میں اوورز کی کوئی قید نہیں ہے۔

کراچی میں ہونے والے اس ٹورنامنٹ میں سات ٹیمیں شریک ہیں۔

اسٹیٹ بینک اسپورٹس کمپلیکس میں پی ٹی وی نے اسٹیٹ بینک کے خلاف ٹاس جیت کر پہلے بیٹنگ کی، پی ٹی وی کی پوری ٹیم صرف 66 رنز بناکر آؤٹ ہوگئی، پی ٹی وی کی جانب سے عزیر ممتاز 21 رنز بنا کر ٹاپ اسکورر رہے۔

اسٹیٹ بینک کی جانب سے محمد عباس نے شاندار بولنگ کرتے ہوئے صرف 19 رنز دے کر6 وکٹیں حاصل کیں جبکہ ثمین گل نے تین کھلاڑیوں کو18 رنز دے کر آؤٹ کیا۔

اسٹیٹ بینک نے کھیل ختم ہونے پر اپنی پہلی اننگز میں ایک وکٹ کے نقصان پر 201 رنز  بنائے ۔

زین عباس تیرہ چوکوں اور تین چھکوں کی مدد سے 109 رنز بناکر ناٹ آؤٹ رہے، عمر امین 64 رنز پر کھیل رہے تھے۔ دونوں بیٹسمین دوسری وکٹ کی شراکت میں 159رنز کا اضافہ کرچکے ہیں۔

دوسرے میچ میں نیشنل بینک اسٹیڈیم میں ایس این جی پی ایل نے غنی گلاس کے خلاف ٹاس جیت کر پہلے بیٹنگ کی اور 80  اوورز میں سات وکٹوں کے نقصان پر 371 رنز بنائے۔

عابدعلی نے تیرہ چوکوں کی مدد سے90  رنز اسکور کیے، اسد شفیق نے نو چوکوں اور ایک چھکے کی مدد سے 81 رنز بناکر آؤٹ ہوئے، صاحبزادہ فرحان نے نو چوکوں اور ایک چھکے کی مدد سے 67 رنز بنائے۔

عمیر بن یوسف نے 56 رنز بنائے جس میں پانچ چوکے اور ایک چھکا شامل تھا۔

لیگ اسپنر محمد رمیز نے 130 رنز دے کر 6 وکٹیں حاصل کیں۔

غنی گلاس کی ٹیم نے جوابی اننگ میں تین اوورز کی بیٹنگ کی لیکن کوئی رن نہیں بنایا تھا اور اس کی کوئی وکٹ نہیں گری تھی۔

یو بی ایل اسپورٹس کمپلیکس میں ایونٹ کے تیسرے میچ میں کے آر ایل نے ٹاس جیت کر واپڈا کو بیٹنگ دی، واپڈا نے 80  اوورز کی بیٹنگ میں6 وکٹوں کے نقصان پر322 رنز اسکور کیے۔

افتخار احمد نے 180 گیندوں پر پندرہ چوکوں اور چار چھکوں کی مدد سے155 رنز بنائے، محمد سلیم نے 117 رنز کی اننگ کھیلی جس میں 12 چوکے شامل تھے۔

کے آر ایل کے محمد عمران نے تین وکٹیں حاصل کیں۔

کے آر ایل نے پہلے دن کھیل ختم ہونے پر بغیر کسی نقصان کے 23 رنز بنائے تھے۔