نئی دہلی: بھارت میں بابری مسجد کی شہادت کے بعد مسلمانوں کے دیگر مقدس مقامات بھی نشانے پر ہیں۔

جس سرزمین پر اکثریت اقلیت سے ڈرنے لگتی ہے وہاں تاریخ اور انسانیت دونوں کی شکل بگڑ جاتی ہے اور جس زمین پر مذہب سیاست میں شامل ہوجائے وہاں انسانوں کی فلاح کی بجائے تقسیم کا نوحہ لکھا جاتا ہے۔

رام مندر کے افتتاح سے بھارتی مسلمانوں کی مشکلات مزید بڑھ گئی ہیں جب کہ مودی سرکار کے انتہا پسند اقدامات نے بھارت کی سرزمین مسلمانوں پر تنگ کردی ہے۔

یہ بھی پڑھیں: مودی سرکار بھارت کو سیکولر ریاست ظاہر کرنے میں ناکام

سرکاری ریکارڈ کے مطابق ایودھیا میں 55 مساجد، 22 قبرستان، 22 مزارات اور 11 امام بارگاہیں موجود ہیں۔

ایودھیا وقف بورڈ کے صدر محمد اعظم قادری کہتے ہیں کہ رام مندر کے حق میں بھارتی سپریم کورٹ کا فیصلہ آنے کے بعد انتہا پسند ہندو مافیا کی نگاہیں مسلمانوں کے قبرستانوں پر لگی ہوئی ہیں۔

انہوں نے کہا کہ مسلمانوں کے کئی قبرستانوں اور وقف کی جائیدادوں پر قبضہ مافیا ہندو تسلط جما چکے ہیں۔

غیر ملکی خبر رساں ادارے کے مطابق رام مندر کی مزید توسیع کا امکان ہے جس کی زد میں مسلمانوں کے بہت سے قبرستان اور مقبرے آسکتے ہیں۔

متنازعہ رام مندر کی تعمیر میں مذہبی قوم پرستی کی نئی بنیاد رکھتے ہوئے بھارت کی سیاست کا منظرنامہ بدل گیا ہے۔

یہ بھی پڑھیں: ’’رام مندر یا بھارتی سیکولرازم کی سمادھی‘‘

خبر رساں ادارے کا کہنا ہے کہ مسلمانوں کی زمینوں اور قبرستان پر تیزی سے قبضہ کیا جا رہا ہے، رام مندر کے افتتاح کے بعد ایودھیا کے مسلمان روزگار سے بھی محروم ہوچکے ہیں۔

رپورٹ میں بتایا گیا ہے کہ ایودھیا سے مسلمانوں کے نشانات مٹانے کی کوششیں کی جارہی ہیں.

واضح رہے کہ بھارت میں مسلمانوں پر پہلے بھی ظلم جاری تھا مگر انتہا پسند مودی سرکار کے آنے کے بعد  ظلم اب بربریت کی شکل اختیار کرچکا ہے، فسطائی مودی سرکار کے دور میں بھارت میں ہندومت کے سوا کوئی بھی مذہب محفوظ نہیں۔