سپریم کورٹ آف پاکستان نے تحریکِ انصاف کے رہنما طاہر صادق کو انتخابات لڑنے کی اجازت دے دی۔

طاہرصادق نے این اے 49 اٹک سے کاغذات نامزدگی جمع کرا رکھے ہیں۔

طاہر صادق نے لاہور ہائیکورٹ کے فیصلے کے خلاف سپریم کورٹ سے رجوع کیا تھا۔ لاہورہائی کورٹ نے طاہر صادق کے کاغذات نامزدگی مسترد کردیے تھے۔

جسٹس منصورعلی شاہ کی سربراہی میں تین رکنی بنچ نے سماعت کی۔

دوسری جانب پی پی 19 سے پی ٹی آئی رہنما محمد عارف عباسی کے کاغذات نامزدگی مسترد ہونے کے معاملے پرسپریم کورٹ نے الیکشن ٹریبونل کا فیصلہ برقرار رکھتے ہوئے اپیل خارج کردی۔

عدالتِ عظمٰی نے کہا کہ درخواست گزارنے دو فوجداری مقدمات ہونے کے باجود ضمانت کیلئے کسی عدالت سے رجوع نہیں کیا، درخواست گزارنے دونوں مقدمات کا کاغذات نامزدگی میں بھی ذکر نہیں کیا، ریٹرننگ آفیسر نے بیٹے کی لندن میں موجود جائدادوں کا پوچھا اس کا بھی جواب نہیں دیا گیا۔

ادھرپاکستان تحریک انصاف (پی ٹی آئی) کے رہنما عمراسلم کوبھی الیکشن لڑنے کی اجازت مل گئی ہے۔