امریکا کی بیشتر ریاستوں میں موسم شدید سرد ہوگیا ہے جب کہ مختلف حادثات میں 6 افراد جان کی بازی ہار بیٹھے ہیں۔

غیر ملکی خبر رساں ادارے کے مطابق امریکی شہر ہیوسٹن کا درجہ حرارت نقطہ انجاد پر پہنچ گیا، شہر کے متعدد علاقوں میں سرد ہواؤں کے ساتھ ہلکی برف باری شروع ہوگئی ہے جب کہ لوگ گھروں میں محدود ہوکر رہ گئے ہیں۔

ہیوسٹن کے تعلیمی اداروں میں دو دن کی تعطیل کا اعلان کردیا گیا ہے جب کہ بیشتر سرکاری اور نجی دفاتر میں بھی حاضری نہ ہونے کے برابر رہی۔

شاہراہوں پربرفباری کے باعث سیکڑوں گاڑیاں بے قابو ہوکر حادثات کا شکار ہوگئیں جب کہ سیاہ برف کی تہہ جم جانے کے بعد حادثات کی روک تھام کیلے حکام نے بیشتر مرکزی شاہراہوں کو ٹریفک کیلے بند کردیا۔

پیر کی صبح سے شروع ہونے والی شدید سردی کی لہر منگل کے روز بھی جاری رہے گی۔ منجمد کردینے والی شدید سردی کے باعث گھروں میں پانی کی لائنیں پھٹنے کے خدشے کے پیش نظر شہریوں نے پانی کے پائپوں کو محفوظ بنانے کے اقدامات کیے ہیں۔

دوسری جانب واشنگٹن میں سرد ہوائیں، شدید موسم اور برفباری کے نتیجے میں کاروبار زندگی معطل ہوگیا جب کہ  ریاستی گورنر نے ایمرجینسی نافذ کرنے کے ساتھ  ساتھ ایمرجینسی اداروں کو بھی ہائی الرٹ کردیا ہے۔

واشنگٹن میں ٹریفک کا نظام درہم برہم ہونے کے ساتھ سیکڑوں پروازیں منسوخ ہوگئیں، لوگوں کو گھروں میں رہنے کی ہدایات جاری کی گئی ہیں جب کہ خراب موسم کے باعث تعلیمی اداروں کو بھی بند کردیا گیا ہے۔

امریکا کی بعض ریاستوں میں درجہ حرارت معمول سے بیس سے چالیس ڈگری کم ہوگیا ہے جس کے سبب امریکا کے 80 فیصد شہری نقطہ انجماد سے نیچے درجہ حرارت برداشت کرنے پر مجبور ہیں۔

ریاست اوریگن میں چار اموات رپورٹ ہوئیں ہیں جب کہ 90 ہزار شہری بجلی سے محروم ہیں۔

ریاست فلوریڈا کے بعض حصوں میں بھی درجہ حرارت نقطہ انجماد سے نیچے گرنے کی پیش گوئی کی گئی ہے۔

واضح رہے کہ امریکا میں پچھلے تین روز میں منسوخ یا التواء کا شکار پروازوں کی تعداد 20 ہزار تک پہنچ گئی ہے۔