امریکہ نے پاکستان سمیت 3 ممالک پر ایرانی میزائل حملے کی مذمت کردی۔

امریکہ نے ایک بار پھر ایران کو خطے میں دہشت گردی کا سب سے بڑا اسپانسر قرار دے دیا ہے جب کہ پاکستان پر ایرانی میزائل حملے کے بعد امریکہ کا ردعمل بھی سامنے آگیا ہے۔

ترجمان امریکی محکمہ خارجہ میتھیو ملر نے پریس کانفرنس میں کہا کہ ایران نے تین ہمسایہ ممالک کی خود مختار سرحدوں کی خلاف ورزی کی ہے۔

امریکی ترجمان نے کہا کہ ایران خطےمیں دہشت گردی کا سب سے بڑا اسپانسر ہے، ایک طرف ایران دہشت گردی اور عدم استحکام پھیلا رہا ہے تو دوسری طرف وہ دہشت گردوں کے خلاف کارروائی کا دعویدار ہے۔

میتھیو ملر کہتے ہیں کہ ایران کی وجہ سے ہی امریکہ عراق میں موجود ہے جب کہ چین نے بھی ایران اور پاکستان سے علاقائی استحکام برقرار رکھنے کا مطالبہ کیا ہے۔

یاد رہے کہ 16 جنوری کو ایران نے تمام بین الاقوامی قوانین کی خلاف ورزی کرتے ہوئے پاکستان کی بِلا اشتعال فضائی حدود کی خلاف ورزی کرکے معصوم لوگوں کو نشانہ بنایا تھا۔

دوسری جانب پاکستان نے ایران کے میزائل حملے کے جواب میں ’’آپریشن مرگ بر سرمچار‘‘ کا آغاز کرتے ہوئے آج صبح ایران میں دہشت گردوں کے ٹھکانوں کو نشانہ بنایا ہے۔

 پاکستان نے ایران کے صوبے سیستان بلوچستان میں دہشت گردوں کے ٹھکانوں کو نشانہ بنایا، انٹیلی جنس بیسڈ پاکستانی آپریشن میں متعدد دہشت گرد مارے گئے جب کہ مرگ بر سرمچار آپریشن انتہائی مربوط اور فوجی حملہ تھا۔