نیوزی لینڈ کے فاسٹ بولر ٹم ساؤتھی نے ٹی ٹوئنٹی انٹرنیشنل میں اہم سنگ میل عبور کرلیا۔

تفصیلات کے مطابق  ٹم ساؤتھی نے گزشتہ روز آکلینڈ میں کھیلے گئے  میچ میں پاکستان کے خلاف 4 وکٹیں حاصل کیں اور اس دوران وہ ٹی ٹوئنٹی انٹرنیشنل  میچز میں 150 وکٹیں حاصل کرنے والے پہلے کھلاڑی بن گئے۔

118 ٹی ٹوئنٹی انٹرنیشنل میچز میں ان کی وکٹوں کی مجموعی تعداد 151 ہوگئی ہے۔

بنگلادیش  کے شکیب الحسن 117 میچز میں 140 وکٹوں کے ساتھ دوسرے اور افغانستان کے راشد خان 82 میچز میں 130 وکٹوں ساتھ تیسرے نمبر پر ہیں۔

ٹم ساؤتھی کے ہم وطن اش سودھی 106 میچز میں 127 وکٹوں کے ساتھ اس فہرست میں چوتھے نمبر پر ہیں۔

https://twitter.com/ICC/status/1745868450621210655

پاکستان کی جانب سے ٹی ٹوئنٹی انٹرنیشنل میچز کھیلنے والے موجودہ کھلاڑیوں میں سب سے زیادہ (104) وکٹیں  شاداب خان کی ہیں جبکہ دوسرے نمبر پر 85 وکٹوں کے ساتھ حارث رؤف ہیں۔

ٹی ٹوئنٹی انٹرنیشنل کرکٹ  کے آغاز میں پاکستانی بولرز کا راج ہوا کرتا تھا۔شاہد آفریدی  نے 98  جبکہ عمر گل  اور سعید اجمل نے  85 ،85 وکٹیں حاصل کررکھی ہیں۔