نگران حکومت نے 12 جنوری سے آئی فون قسطوں پر دینے کا فیصلہ کیا ہے۔

نگران وفاقی وزیر برائے انفارمیشن ٹیکنالوجی ڈاکٹر عمر سیف نے  صحافیوں سے گفتگو کرتے ہوئے کہا کہ وفاقی حکومت نے فری لانسرز کی دیرینہ مانگ کو  حل کرتے ہوئے انہیں بین الاقوامی گیٹ وے پے پال کے ذریعے ترسیلات زر کو چینلائز کرنے کے قابل بنایا۔

وفاقی وزیر انفارمیشن ٹیکنالوجی اور ٹیلی کمیونیکیشن نے اعلان کیا کہ فائیو جی اگلے سال جولائی میں شروع کیا جائے گا اور 300 میگا ہرٹز سپیکٹرم نیلامی کے لیے پیش کیا جائے گا۔

ڈاکٹر عمرسیف نے کہا کہ کابینہ نے نجی شعبے کی کمپنیوں کو خلا میں کم مدار میں سیٹلائٹ استعمال کرنے کی اجازت دینے کے لیے قومی خلائی پالیسی کی منظوری دے دی ہے۔

ایک سوال کے جواب میں نگراں وفاقی وزیر کا کہنا تھا کہ وزارت ٹیلی کام کمپنیوں کے دیگر تمام اسٹیک ہولڈرز کے تعاون سے 12 جنوری 2024 سے ایک اور اقدام شروع کرے گی جس کے تحت صارفین کو جدید ترین ماڈل فون آسان قسطوں پر ملیں گے۔

انہوں نے مزید کہا کہ قسطوں پر آئی فون پیش کرنے کا منصوبہ بنایا گیا ہے، قسط ادا کرنے میں ناکامی کی صورت میں پاکستان ٹیلی کمیونیکیشن اتھارٹی (پی ٹی اے ) ڈیوائس کی شناخت، رجسٹریشن اور بلاکنگ سسٹمز (ڈی آئی آر بی ایس )کی طرز پر ہینڈ سیٹ کو بلاک کر دے گی۔