نگران وزیر صحت ڈاکٹر ندیم جان نے کہا ہے کہ پاکستان میں کورونا کے نئے ویرئینٹ کے پھیلاؤ کا خطرہ ہے۔

تفصیلات کے مطابق نگران وزیر اطلاعات مرتضی سولنگی کے ہمراہ پریس کانفرنس میں نگران وزیر صحت ڈاکٹر ندیم جان کا کہنا تھا کہ کل سے اسلام آباد میں عالمی صحت تحفظ سربراہ کانفرنس منعقد کرنے جا رہے ہیں ، نگران وزیراعظم کانفرنس کی افتتاحی تقریب میں شرکت کریں گے۔

وزیر صحت نے کہا کہ کانفرنس بلانے کا مقصد دنیا کو ہیلتھ سیکورٹی کے حوالے سے محفوظ کرنا ہے، کسی بھی وائرس کے پاس پاسپورٹ نہیں ہوتا، وائرس سرحدوں کو نہیں دیکھتا۔

وزیر صحت نے کہا کہ کانفرنس میں اس بات پر زور دیا جائے گا کہ غریب ممالک کو بھی وہی سہولیات ملنی چاہئیں جو امیر ممالک کو حاصل ہیں، پاکستان میں ہیلتھ سیکٹر کو لیڈ کرنے کی صلاحیت موجود ہے۔

وزیر صحت نے کہا کہ پاکستان میں ویکسین کی تیاری کیلئے نجی شعبے میں ایک کنسورشیم بنا رہے ہیں، نئے کورونا ویرئینٹ سے پاکستان میں خطرہ ہے تاہم یہ مہلک نہیں۔

نئے کورونا ویرینٹ جے این ون کے پھیلاؤ کا خطرہ ہے، ائیرپورٹس پر دو فیصد رینڈم اسکریننگ شروع کر دی ہے، بھارت اور دیگر ممالک میں جے این ون ویرئینٹ موجود ہے اور پاکستان میں نئے ویریئینٹ کے کچھ کیس سامنے آئے ہیں۔

نگران وزیر صحت نے کہا کہ غزہ کے معاملے پر پاکستان نے بھرپور آواز اٹھائی، میرے پاس 500 ڈاکٹر موجود ہیں جو غزہ میں سروسز دینے کو تیار ہیں، وہ کہتے ہیں بے شک شہید ہو جائیں لیکن ہمیں بھجوا دیں جبکہ ہمارے وزیراعظم نے بھی اس معاملے پر بھرپور آواز اٹھائی، غزہ متاثرین کی پاکستان بھرپور مدد کرے گا۔