عام انتخابات میں فوج اور سول آرمڈ فورسز کی تعیناتی کے معاملے میں الیکشن کمیشن نے نوٹیفکیشن جاری کر دیا ہے۔

تفصیلات کے مطابق الیکشن کمیشن نے ملک بھر میں ہونے والے عام انتخابات میں فوج اور سول آرمڈ فورسز کی تعیناتی کے حوالے سے نوٹیفکیشن جاری کر دیا ہے۔

واضح رہے کہ عام انتخابات میں فوج کی تعیناتی کی منظوری وفاقی کابینہ نے گزشتہ روز ہونے والے اجلاس میں دی تھی۔

آئین کے آرٹیکل 245 کے تحت ملک میں فوج تعینات کی جائے گی، فوج کوئک رسپانس فورس کے طور پر حساس پولنگ سٹیشنز کے باہر تعینات ہو گی۔

الیکشن کمیشن کے نوٹیفکیشن کے مطابق فوج کی تعیناتی 5 فروری سے 10 فروری تک ہو گی، فوج کی تعیناتی انتخابات کو شفاف اور پرامن بنانے کیلئے کی گئی ہے۔

سول آرمڈ فورسز پرنٹنگ کارپوریشن آف پاکستان اور پاکستان پوسٹ فائونڈیشن میں بھی تعینات کی گئی ہے۔

الیکشن کمیشن کے نوٹیفکیشن کے مطابق سول آرمڈ فورسز  کی تعیناتی 12 جنوری سے 8 فروری تک رہے گی۔