جنوبی افریقہ میں جاری انڈر 19 ورلڈکپ میں  پاکستان نے  مسلسل دوسری فتح حاصل کرلی۔

تفصیلات کے مطابق  پاکستان  نے بفیلو پارک میں کھیلے  گئے انڈر 19 ورلڈکپ 2024  کے اپنے دوسرے میچ  میں نیپال  کو پانچ وکٹوں سے شکست دے دی۔

پاکستان نے 198 رنز کا ہدف آذان اویس کی ناقابل شکست 63 رنز کی اننگز کی بدولت 48ویں اوور میں پانچ وکٹوں کے  نقصان پر حاصل کرلیا۔ہارون ارشد 15 رنز بناکر ناٹ آؤٹ رہے۔

شامل حسین اور شاہزیب خان 37،37، احمد حسن 29، عرفات منہاس 8 اور کپتان سعد بیگ بغیر کوئی رن بنائے آؤٹ ہوئے۔

نیپال کی جانب سے آکاش چند نے 3 جبکہ دیپیش کاندیل اور آکاش تریپاٹھی نے ایک ایک وکٹ حاصل کی۔

اس سے قبل نیپال کی ٹیم ٹاس جیت کر پہلے بیٹنگ کرتے ہوئے 197 رنز  بناکر آؤٹ ہوگئی تھی۔بپن راول 39 اور کپتان دیو کھنل 23 رنز بناکر نمایاں رہے تھے۔

پاکستان کی جانب سے عرفات منہاس نے 3، احمد حسن اور عبید شاہ نے 2،2 جبکہ خبیب خلیل، محمد ذیشان اور علی اسفند نے ایک ایک وکٹ حاصل کی۔

پاکستان اپنا آخری گروپ میچ 27 جنوری کو نیوزی لینڈ کے خلاف کھیلے گا۔

واضح رہے کہ پاکستان نے پہلے میچ میں افغانستان کو 181 رنز سے شکست دے کر ایونٹ کا فاتحانہ آغاز کیا تھا۔