چین کے شہرزاؤ ٹونگ میں لینڈ سلائیڈنگ سے 2 افراد ہلاک ہوگئے جب کہ 500 افراد کو بچالیا گیا۔

غیر ملکی خبر رساں ادارے کے مطابق چین کے صوبہ یوننان کے شہر ژاؤتونگ کے قریب لینڈ سلائیڈنگ کے باعث سینکڑوں افراد ملبے تلے دب گئے۔

حکام کے مطابق ملبے میں پھنسے 500 افراد کو باحفاظت نکال لیا گیا جب کہ 47 افراد تاحال ملبے تلے پھسنے ہوئے ہیں۔

ژاؤتونگ شہر کی زین شیونگ کاؤنٹی میں امدادی سرگرمیاں جاری ہیں تاہم لینڈ سلائیڈنگ کی وجہ تاحال معلوم نہیں ہوسکی ہے۔

یاد رہے کہ یوننان ایک پہاڑی علاقہ ہے جہاں اکثر لینڈ لائیڈنگ کے واقعات رونما ہوتے رہتے ہیں جب کہ گذشتہ روز علاقے میں ہونے والی برفباری کے نتیجے میں سردی کی شدت میں اضافہ ہوگیا تھا۔

گو نامی عینی شاہد کے مطابق ’’پہاڑ گرنے سے درجنوں افراد اس کے نیچے دب گئے تھے‘‘۔

حکام کا کہنا ہے کہ 200 سے زائد امدادی کارکنان نے ریسکیو آپریشن شروع کردیا ہے جب کہ لوگوں کو ملبے سے نکالنے کے لیے فائر انجن سمیت دیگر آلات کو تعینات کردیا گیا ہے۔

اس موقع پر چینی صدر شی جن پنگ کہتے ہیں ’’ریسکیو فورسز کو فوری طور پر منظم کیا جائے اور جہاں تک ممکن ہوسکے ہلاکتوں کو کم کرنے کی کوشش کی جائے‘‘۔