بانی پی ٹی آئی کی ضمانتیں منسوخ کرنے کیخلاف درخواستوں پرسماعت23 جنوری تک ملتوی کردی گئی۔

لاہور ہائیکورٹ میں پاکستان تحریک انصاف کے سربراہ کی دہشت گردی کیسوں میں ضمانتیں منسوخ کرنے کیخلاف درخواستوں پر سماعت ہوئی۔

عدالت نے پراسیکیوٹر جنرل اور وکیل بانی چیئرمین پی ٹی آئی کو تیاری کیلئے مہلت دیتے ہوئے کیس کی سماعت 23 جنوری تک ملتوی کردی۔

پراسیکیوٹر جنرل پنجاب سید فرہاد علی شاہ عدالت میں پیش ہوئے اور عدالت سے استدعا کی کہ کیس میں اہم قانونی نقاط وضاحت طلب ہیں تیاری کیلئے مہلت دی جائے۔

عدالت نے بانی چیئرمین پی ٹی آئی وکیل سےاستفسارکیا کہ بتائیے کہ ان درخواستوں پر آپ کو ریلیف ملا؟ وکیل نے جواب دیا کہ جی ان درخواستوں میں عبوری ضمانت ملی تھی۔

ہائیکورٹ نے استفسارکیا کہ کس کس تاریخ کو درخواست گزار پیش ہوئے؟ وکیل نے استدعا کی کہ تمام دستاویزات اور ریکارڈ پیش کرنے کیلئے مہلت دی جائے۔

جسٹس عالیہ نیلم کی سربراہی میں دو رکنی بنچ نے چیئرمین پی ٹی آئی کی سات درخواستوں پر سماعت کی۔ چئیرمین پی ٹی آئی کی جانب سے ایڈووکیٹ سلمان صفدرعدالت میں پیش ہوئے۔

درخواستوں میں انسدادِ دہشت گردی عدالت کے جج اور تھانہ گلبرگ اور تھانہ سرور روڈ پولیس کو فریق بنایا گیا ہے۔

وکیل درخواست گزار نے مؤقف اپنایا کہ درخواست گزار دہشت گردی عدالت میں مسلسل پیش ہوتے رہے، اس دوران ٹرائل کورٹ نے درخواست گزار کو توشہ خانہ کیس میں سزا سنا دی۔ پولیس نے درخواست گزار کو گرفتار کرکے اٹک جیل منتقل کر دیا۔

وکیل پی ٹی آئی نے کہا کہ درخواست گزار جیل میں ہونے کی بنا پر انسدادِ دشت گردی عدالت میں پیش نہ ہوئے، ٹرائل کورٹ نے عدم پیروی انکی لی گئی ضمانتوں کو کینسل کر دیا۔ ٹرائل کورٹ کے اس فیصلے سے انکا ناقابل تلافی نقصان ہوا۔ استدعا ہے کہ عدالت ٹرائل کورٹ کے ضمانتوں کو کینسل کرنے کے 11 اگست کے فیصلے کو کالعدم قرار دے۔