مبینہ غیر قانونی بھرتیوں کے مقدمے میں عدالت نے سابق وزیراعلی پنجاب پرویزالہی سمیت دیگر ملزمان کو فرد جرم کے لیے آئندہ سماعت پرطلب کر لیا۔

اینٹی کرپشن عدالت لاہورمیں پنجاب اسمبلی میں مبینہ غیر قانونی بھرتیوں کے مقدمے میں سماعت کے دوران عدالت نے تمام ملزمان کو چالان کی کاپیاں تقسیم کردیں۔

سابق وزیراعلی پنجاب پرویزالہی، محمد خان بھٹی کو عدالت پیش نہ کیا گیا جس پرعدالت نے برہمی کا اظہار کرتے ہوئے کہا کہ جب ملزم جیل میں ہوتا ہے تو ایسے حاضری معافی نہیں ہوتی۔

عدالت نے کہا کہ ملزم جیل میں ہے تو اسکی حاضری معافی کے لیے درخواست کی ضرورت نہیں۔

فہد، طاہرمکی، حیدر، سمیع اللہ، محمدعبداللہ، مختاراحمد، محمد امین سمیت دیگر ملزمان عدالت پیش ہوئے۔

جج ارشد حسین بھٹہ نے ریمارکس دیے کہ یہ میری عدالت ہے اس میں قانون کے مطابق فیصلہ ہوگا، جج چھٹی پرچلا جائے تو کیا دس دن پہلے آپ کسی ڈیوٹی جج سے آرڈر کروا لیں گے۔ میں نے ملزم کو طلب کیا ہوا ہے ملزم کو پیش کیوں نہیں کیا۔

عدالت نے کہا کہ میں سپریٹنڈنٹ جیل کو شوکاز نوٹس جاری کروں گا۔

اینٹی کرپشن عدالت کے جج ارشد حسین بھٹہ نے کیس کی سماعت کی۔ اینٹی کرپشن اسٹیبلشمنٹ نے مقدمہ درج کررکھا ہے۔