انسداد دہشت گردی عدالت لاہورنے جناح ہاؤس حملہ کیس کے266 ملزمان کےمقدمے کا ٹرائل شروع کردیا۔

میاں محمود الرشید، عالیہ حمزہ، صنم جاوید اورطیبہ راجہ سمیت 130 ملزمان کو جیل سےعدالت میں پیش کیا گیا۔

میاں محمود الرشید سمیت دیگر زیرحراست ملزمان کی ٹرائل کیلئے حاضری مکمل کی گئی، عدالت نے آئندہ سماعت پرخدیجہ شاہ سمیت تمام ملزمان کو بھی طلب کرلیا۔

عدالت نے مزید سماعت 27 جنوری تک ملتوی کرتے ہوئے کہا کہ آئندہ سماعت پرملزمان کو چالان کی نقول تقسیم کی جاییں گی۔

انسداد دہشت گردی عدالت کے جج محمد نوید اقبال نے سماعت کی، پراسیکیوشن نے جناح ہاؤس حملہ کیس کا چالان عدالت میں جمع کرا رکھا ہے۔

چالان میں میاں محمود الرشید، اعجازچوہدری، عمرسرفرازچیمہ شامل ہیں۔ خدیجہ شاہ، روبینہ جمیل، صنم جاوید، عالیہ حمزہ، طیبہ عنبرین راجہ، عائشہ علی بھٹہ کے علاوہ ملزمہ فرزانہ سروراور صنم جاوید کے شوہرعتیق ریاض سمیت 266 ملزمان شامل ہیں۔

ملزمان پر جناح ہاؤس حملہ اورجلاؤ گھیراؤ کا الزام ہے۔ مقدمہ میں بغاوت اورعوام کو فسادات پراکسانے کی دفعات شامل ہیں۔

چالان کے ساتھ جلاؤ گھیراؤ کی فوٹیج اورشواہد لگائے گئے ہیں، ملزمان کیخلاف تھانہ سرور روڈ میں مقدمہ درج ہے۔