کراچی: ایڈیشنل آئی جی کراچی نے عام انتخابات کے لیے 80 فیصد شہر کو حساس قرار دے دیا۔

کراچی میں عام انتخابات کو پر امن رکھنے کے لیے پولیس کو افرادی قوت میں کمی کا سامنا ہے تاہم ایڈیشنل آئی جی کراچی نے حکومت سے افرادی قوت کی فراہمی کا مطالبہ کردیا ہے۔

ایڈیشنل آئی جی کراچی خادم حسین رند کہتے ہیں کہ شہر میں عام انتخابات کے لئے 5 ہزاد سے زائد پولنگ اسٹیشن بنائے گئے ہیں، مجموعی پولنگ اسٹیشنز میں سے 2 ہزار پولنگ اسٹیشن انتہائی حساس ہیں۔

انہوں نے کہا کہ شہر میں حساس پولنگ اسٹیشنز کی تعداد 2 ہزار 700 کے قریب ہے، پولنگ اسٹیشنز اور عوام کی حفاظت کے لئے 45 ہزار فورس کی ضرورت ہے جب کہ کراچی پولیس کے پاس صرف 35 ہزار فورس موجود ہے۔

خادم حسین رند کا کہنا ہے کہ کراچی پولیس کو الیکشن ڈیوٹی کے لئے 10 ہزار پولیس فورس کی کمی کا سامنا ہے جس کے لیے حکومت سے 10 ہزار فورس فراہم کرنے کا مطالبہ کیا ہے جب کہ مطلوبہ 10 ہزار فورس میں 9 ہزار مرد اور 1 ہزار خواتین کی ضرورت ہے۔

ایڈیشنل آئی جی کراچی کا کہنا تھا کہ مرد فورس کی کمی کو اینٹی انکروچمنٹ، مختلف سیلز اور اداروں سے پورا کیا جائے گا، خواتین فورس کمی کو پورا کرنے کے لیے لیڈی ہیلتھ ورک کی خدمات لی جائیں گی۔

انہوں نے بتایا کہ حکومت نے کراچی پولیس کے مطالبات کو منظور کرلیا ہے، فراہم کردہ افراد پولیس ٹریننگ کے حامل افراد نہ ہوئے تو شارٹ کورس کرائیں جائیں گے کہ باڈی سرچ کس طرح کی جاتی ہے، کس طرح کیو بنائی جاتی ہے اور کس طرح نگرانی کی جاتی ہے یہ سب سیکھایا جائے گا۔

خادم حسین رند نے یہ بھی بتایا کہ اہم چیز خودکش بمبار سے متعلق معلومات ہیں جس سے انہیں آگاہ کیا جائے گا، خودکش بمبار کیسا دیکھتا ہے، کس طرح کے کپڑے پہنتا ہے، سب بتایا جائے گا۔ عام انتخابات میں ڈیوٹی انجام دینے والے کسی اہلکار کے پاس اسلحہ نہیں ہوگا جب کہ الیکشن ڈیوٹی میں چند پولیس افسران کو ہتھیار رکھنے کی اجازت ہوگی۔

ایڈیشنل آئی جی کراچی کا مزید کہنا تھا کہ الیکشن سیکیورٹی طے شدہ منصوبے کے تحت عمل میں لائی جائے گی، انتہائی حساس پر 8، حساس پر 6 اور نارمل پر 4 افسران و اہلکار ڈیوٹی دیں گے۔