سپریم کورٹ آف پاکستان نے پی ٹی آئی کے امیدوارشوکت بسرا اور صنم جاوید کو الیکشن لڑنے کی اجازت دے دی۔

شوکت بسرا این اے 163 سے تحریک انصاف کے امیدوارہیں۔ صنم جاوید این اے 119، این اے 120 اورپی پی 150 سے پی ٹی آئی کی امیدوار ہیں۔

سپریم کورٹ نے صنم جاوید کے قومی اسمبلی کے حلقہ این اے 119، این اے 120 اور پی پی 150 سے کاغذات نامزدگی منظورکرتے ہوئے ہائیکورٹ کا فیصلہ کالعدم قراردے دیا۔

سپریم کورٹ میں صنم جاوید اورشوکت بسرا کے کاغذات نامزدگی کیس کی سماعت کے دوران وکیل درخواست گزار نے عدالت کے سامنے مؤقف اپنایا کہ صنم جاوید کے کاغذات الگ بنک اکائونٹ نہ کھلوانے پرمسترد ہوئے، صنم جاوید نے اپنے والد کیساتھ مشترکہ اکائونٹ کاغذات میں ظاہر کیا تھا۔

وکیل صنم جاوید نے کہا کہ اعتراض کیا گیا کہ الیکشن کیلئےالگ اکائونٹ کیوں نہیں بنایا گیا، صنم جاوید گزشتہ 9 ماہ سے جیل میں ہیں، جیل میں موجود خاتون بنک اکائونٹ کیسے کھلواسکتی ہے؟

وکیل شوکت بسرا نے مؤقف اختیارکیا کہ شوکت بسرا نے ایک مشترکہ دوسرا الگ اکائونٹ ریٹرننگ افسر کو دیا، ریٹرننگ افسر نے سنگل اکائونٹ وصول کرنے سے ہی انکارکردیا، ریٹرننگ افسرنے کہا تین بجے کا وقت ختم ہوچکا۔

جسٹس عرفان سعادت خان نے کہا کہ تین بجے کا وقت کہاں سےنکالا ہے الیکشن کمیشن نے؟ الیکشن شیڈیول میں تو نہیں لکھا کہ تین بجے تک کاغذات جمع ہونگے۔

جسٹس منیب اختر نے کہا کہ مقررہ وقت کے آدھے گھنٹے بعد کاغذات جمع کرانے والوں کو الیکشن سے محروم کیسے رکھا جا سکتا ہے؟ قانون کے مطابق نیا اکائونٹ کھلوایا جائے توسنگل پہلے سے موجود مشترکہ بھی قابل قبول ہوگا، قانون میں مشترکہ اکائونٹ پر کوئی پابندی نہیں ہے۔