جسٹس ریٹائرڈ مظاہرنقوی کی سپریم جوڈیشل کونسل کارروائی کیخلاف درخواست پر آٹھ جنوری کی سماعت کا تحریری حکم نامہ جاری۔

سپریم کورٹ کے حکم نامے کے مطابق سپریم جوڈیشل کونسل کارروائی روکنے کی استدعا اس مرحلے پر قابل قبول نہیں، عدالت نے صرف شکایت کنندگان کو فریق بنانے کے نکتے پر دلائل سنے۔

حکم نامے میں کہا گیا کہ مؤقف سنے بغیرکسی کےخلاف کوئی حکم جاری نہیں کیا جا سکتا، جسٹس نقوی کی آئینی درخواست میں شکایات کو سیاسی اور بدنیتی پرمبنی قراردینے کی استدعا ہے۔

حکم نامے کے مطابق دوسرے فریق کو سنے بغیر شکایت کو بدنیتی پر مبنی قرار نہیں دیا جا سکتا، گزشتہ سماعت پر بنچ کی تشکیل پر اعتراض کیا گیا جسے آج واپس لے لیا گیا، درخواست ضروری ترامیم کے بعد دوبارہ دائر ہونے پر سماعت کیلئے مقرر کی جائے۔