اسموگ اورخشک سردی کے باعث پنجاب میں نمونیہ کیسز میں اضافہ جاری ہے۔ گذشتہ چوبیس گھنٹوں میں پنجاب میں نمونیہ کے مزید 668 کیس رپورٹ ہوئے۔

لاہور میں گزشتہ چوبیس گھنٹوں میں 118  کیسز رپورٹ ہوئے جبکہ لاہورمیں مجموعی کیسزکی تعداد 1155 جبکہ پنجاب میں مجموعی طورپر7743  سے زائد کیسز رپورٹ ہوئے ہیں۔

گذشتہ چوبیس گھنٹوں کے دوران پنجاب میں نمونیہ کی وجہ سے 10  بچے جاں بحق ہوگئے جبکہ  لاہورمیں گزشتہ چوبیس گھنٹوں میں ایک بچہ جاں بحق ہوا۔

نمونیہ سے جاں بحق بچوں کی مجموعی تعداد 172 تک پہنچ گئی ہے۔ لاہورکے اسپتالوں میں نمونیہ، چیسٹ انفیکشن اور وائرل انفیکشن کے سیکڑوں بچے زیرعلاج ہیں۔

چلڈرن اسپتال میں 40 سے زائد بچے، جناح اسپتال، سروسز، جنرل اور گنگا رام اسپتال میں بھی بچے زیرعلاج ہیں۔

عام مارکیٹ میں نمونیہ ویکسین اور ادویات عدم دستیاب ہیں جس کے باعث ادویات کی عدم دستیابی سے مریضوں کو شدید مشکلات کا سامنا ہے۔

ڈائریکٹرسی ڈی سی کا کہنا ہے کہ بچوں کو حفاظتی ٹیکوں کا کورس ضرور مکمل کروائیں۔