ایم کیو ایم پاکستان کے رہنما فاروق ستار نے کہا ہے کہ سندھ میں آئندہ حکومت ہماری ہوگی۔

تفصیلات کے مطابق ایم کیو ایم پاکستان کے کراچی کے باغ جناح میں جلسہ عام سے خطاب کرتے ہوئے ڈاکٹر فاروق ستار نے کہا کہ آج کا جلسہ ثابت کررہا ہے کہ سندھ میں تبدیلی آرہی ہے، جلسے میں لاکھوں کی تعداد میں لوگ موجود ہیں، ایم کیوایم ون ڈے میچ کھیل کر مخالفین کو فارغ کر دیتی ہے، آج عوام نے ٹی ٹوینٹی میچ کھیل کر سندھ سے بدترین حکمرانی ختم کردی ہے۔

فاروق ستار نے کہا کہ سندھ کے15سالہ دورمیں ظلم کے نئے ریکارڈ توڑے گئے، سندھ میں آئندہ حکومت ہماری ہوگی۔

انہوں نے کہا کہ 8 فروری کومظلوموں کوآزادی ملے گی، فروری کو کرپٹ حکمرانوں سے نجات ملےگی، آج فتح کا عقد ہوگیا انشاءاللہ8 فروری کو ولیمہ کی دعوت ہوگی، آج ایم کیوایم دلہن کی طرح شہری سندھ میں واپس آگئی۔

ان کا کہنا تھا کہ ایم کیوایم8فروری کے بعد بجلی اور گیس کے بحران کوختم کرے گی، کراچی والوں کو بہت جلد سرکلر ٹرین اور اچھی ٹرانسپورٹ ملےگی۔

فاروق ستار نے کہا کہ وڈیرے اور جاگیردار کراچی کے نوجوانوں کی5 لاکھ نوکریاں کھا گئے،5 لاکھ نوکریاں واپس لیں گے، بدترین دور کا خاتمہ کریں گے۔

انہوں نے کہا کہ میٹرک بورڈ نے2لاکھ اور انٹربورڈ نے 1 لاکھ بچوں کو فیل کردیا، میٹرک،انٹربورڈز نے بچوں کے مستقبل سے کھلواڑ کیا، ایم کیوایم پاکستان کو بورڈ آفس کے سامنےمظاہرہ کرنا ہوگا۔

ایم کیو ایم پاکستان کے رہنما فاروق ستار نے مزید کہا کہ پیپلزپارٹی نے اپنا میئرزبردستی بٹھا دیا، جو مینڈیٹ چھینا سود سمیت واپس لیں گے، ایم کیوایم پاکستان اپنا مینڈیٹ اور میئرواپس لائے گی۔