سابق فاسٹ بولر محمد عامر نے قومی ٹیم میں دوبارہ شمولیت کے امکان کے بارے میں کھل کر بات کی ہے۔

پاکستان کرکٹ ٹیم کے سابق فاسٹ بولر محمد عامر ان دنوں آئی ایل ٹی ٹوئنٹی میں ڈیزرٹ وائپرز کی نمائندگی کررہے ہیں۔

گذشتہ روز گلف جائنٹس کے خلاف کھیلے گئے میچ میں انہوں نے 4 اوورز میں 27 رنز دے کر ایک وکٹ حاصل کی تھی۔

سابق فاسٹ بولر نے وائپرز ٹیم ہوٹل میں اپنے کرکٹ کیریئر پر تبادلہ خیال کرتے ہوئے کہا ’’میری زندگی میں اب کرنے کے لیے بہت سی مختلف چیزیں ہیں اور اس وقت میں آگے بڑھ گیا ہوں‘‘۔

انہوں نے کہا ’’تین سال باہر رہنے کے بعد مجھے نہیں لگتا کہ واپس آنا میرے لیے کوئی سمجھداری والا فیصلہ ہوگا لہذا میرے لیے یہ بحث اب ختم ہوچکی ہے‘‘۔

واضح رہے کہ محمد عامر نے 2020 میں اس وقت کے ہیڈ کوچ مصباح الحق اور بولنگ کوچ وقار یونس کی جانب سے اپنے ساتھ ہونے والی ناانصافی کا حوالہ دیتے ہوئے بین الاقوامی کرکٹ سے ریٹائرمنٹ کا اعلان کیا تھا۔