پنجاب حکومت کی جانب سے موسم سرما کی تعطیلات میں توسیع کے باوجود راولپنڈی میں متعدد پرائیویٹ اسکولز کھل گئے۔

تفصیلات کے مطابق راولپنڈی میں متعدد پرائیویٹ اسکولز نے پنجاب حکومت کے احکامات کی خلاف ورزی کرتے ہوئے اسکولز کھول دیے اور شدید سردی اور دھند کے باوجود بچے اسکول جانے پر مجبور ہیں۔

یاد رہے کہ سردی کی شدت کو دیکھتے ہوئے والدین کی جانب سے موسم سرما کی تعطیلات میں اضافے کا مطالبہ کیا گیا ہے جس پر صوبائی حکومت نے صوبے میں موسم سرما کی تعطیلات میں چند دن کی توسیع کردی گئی۔

تاہم اب کچھ اسکولوں کی جانب سے صوبائی حکومت کے فیصلے کی خلاف ورزی کی گئی ہے جس پر پرائیویٹ اسکولز کی من مانیوں سے تنگ والدین نے پنجاب حکومت سے نوٹس لینے کا مطالبہ کیا ہے۔

خیال رہے کہ پنجاب میں تعلیمی اداروں میں موسم سرما کی تعطیلات یکم جنوری کو ختم ہورہی تھیں اور دو جنوری سے اسکولز اور کالجز نے کھلنا تھا تاہم پنجاب حکومت کی جانب سے موسم سرما کی تعطیلات میں 9 جنوری تک توسیع کی گئی جس کے بعد سرکاری اور نجی اسکولز نے 10 جنوری سے کھلنا تھا۔

اس سے قبل موسم سرما کی تعطیلات میں توسیع پر آل پاکستان پرائیویٹ اسکولز مینجمنٹ ایسوسی ایشن شمالی پنجاب کے صدر ابرار احمد خان بھی تحفظات کا اظہار کرچکے ہیں۔ ان کا کہنا تھا کہ تعطیلات میں توسیع سے میٹرک کے طلباء وطالبات کی پڑھائی انتہائی متاثر ہوگی۔

ذرائع کا کہنا ہے کہ متعدد اسکولز کی جانب سے تعطیلات میں اضافہ نہ کیے جانے کی وجہ خود حکومت بن رہی ہے کیوں کہ صوبائی حکومت نے سرکاری و پرائیویٹ اسکولوں میں موسم سرما کی تعطیلات میں توسیع سے متعلق کوئی نوٹیفیکیشن جاری نہیں کیا۔