قومی ٹیم کے فاسٹ بولر شاہنواز دھانی کے معاملے پر چیف سلیکٹر وہاب ریاض کو تنقید کا سامنا کرنا پڑرہا ہے۔

پاکستان کرکٹ ٹیم کے چیف سلیکٹر وہاب ریاض نے گزشتہ روز نجی ٹی وی چینل پر بیٹھ کر فاسٹ بولر شاہنواز دھانی کی سلیکشن سے متعلق سوال پر کہا کہ شاہنواز دھانی نے پی ایس ایل سے شہرت حاصل کی لیکن ان کی رویے کی بہت سی شکایات ملی ہیں۔

وہاب ریاض کا کہنا تھا کہ شاہنواز دھانی کا رویہ مثبت نہیں ہے اور اس کے علاوہ وہ پریکٹس کے دوران بولنگ نہیں کرواتے اور نیٹ میں بولنگ کروانے سے جان چھڑوانے کی کوشش کرتے ہیں۔

سوشل میڈیا پر صارفین نے وہاب ریاض کے تبصرے کو نامناسب قرار دیتے ہوئے کہا کہ وہاب ریاض کو گھر بھیجا جائے، چھوٹے انسان کو بڑی پوسٹ مل جائے تو وہ پاگل ہوجاتے ہیں۔

ایک اور صارف نے کہا کہ خود چیف سلیکٹر کا رویہ اچھا نہیں ہے، وہ محمد حارث جیسے کھلاڑیوں کے بجائے ان فٹ کھلاڑیوں کو منتخب کررہے ہیں۔

ایک اور صارف نے وہاب ریاض کو تعصب پسند شخص قرار دیتے ہوئے کہا کہ آپ خود ایک چھوٹے کھلاڑی ہو لیکن بڑی پوسٹ پر بیٹھ گئے ہو۔

دوسری جانب سابق وزیر بلدیات سندھ اور پاکستان پیپلز پارٹی کے رہنما ناصر حسین شاہ نے وہاب ریاض کے بیان پر رد عمل دیتے ہوئے کہا کہ ٹیم مینجمنٹ کو کھلاڑیوں سے متعلق ایسے بیانات نہیں دینے چاہئیں۔

ناصر حسین شاہ نے مزید کہا کہ شاہنواز دھانی ایک بہترین بولر ہے، نیشنل کپ کے فائنل کا مین آف دی میچ بھی رہا، حیرت ہے آپ شاہنواز دھانی کو ان فٹ قرار دے رہے ہیں۔