صدرمملکت ڈاکٹرعارف علوی نے سپریم کورٹ کے سینئرجج جسٹس اعجاز الاحسن کا استعفیٰ منظورکرلیا۔ وزارت قانون نے نوٹفکیشن جاری کردیا۔

صدرمملکت ڈاکٹرعارف علوی نے سپریم کورٹ آف پاکستان کے سینئر جج جسٹس اعجازالاحسن کا استعفیٰ وزیراعظم کی ایڈوائس پر منظور کیا۔

جسٹس اعجاز الاحسن نے آئین کے آرٹیکل 179 اور 206 (ایک) کے تحت گذشتہ روزاستعفیٰ دیا۔

سپریم کورٹ کے جج جسٹس مظاہرنقوی کے بعد جسٹس اعجازالحسن نے بھی اپنا استعفیٰ صدرمملکت ڈاکٹر عارف علوی کو بھجوایا تھا۔

جسٹس اعجازالاحسن سپریم کورٹ کی سنیارٹی میں تیسرے سینئرترین جج تھے، موجودہ چیف جسٹس قاضی فائز عیسیٰ کی ریٹائرمنٹ کے بعد رواں سال اکتوبر میں انہیں چیف جسٹس آف پاکستان بننا تھا۔

جسٹس اعجاز الاحسن، جسٹس سردار طارق مسعود کے بعد سینئر ترین جج تھے تاہم جسٹس سردار طارق مسعود 10 مارچ 2024 کوریٹائر ہورہے ہیں۔

صدرمملکت کی منظوری کے بعد وزرات قانون نے جسٹس اعجازالاحسن کے استعفیٰ  سے متعلق نوٹیفکیشن جاری کردیا، استعفیٰ 11جنوری سے منظور ہوا ہے۔