پاکستان اولمپکس ایسوسی ایشن نے 19 سال تک صدر رہنے والے لیفٹننٹ جنرل (ر) عارف حسن کا استعفیٰ منظور کرتے ہوئے عابد علی قادری کو قائم مقام صدر منتخب کرلیا۔

پاکستان اولمپکس ایسوسی ایشن (پی او اے) کی ایگزیکٹو کمیٹی نے لیفٹننٹ جنرل ریٹائرڈ عارف حسن کا استعفیٰ قبول کرتے ہوئے سابق ڈائریکٹر جنرل وفاقی تحقیقاتی ایجنسی عابد علی قادری کو اگلے الیکشنز تک قائم مقام صدر منتخب کرلیا۔

پاکستان اولمپکس ایسوسی ایشن کی ایگزیکٹو کمیٹی کا اجلاس اتوار کو سینیئر نائب صدر سید عاقل شاہ کی صدارت میں ہوا۔ جس میں 25 اراکین نے شرکت کی اور 23 نے لیفٹیننٹ جنرل ریٹائرڈ عارف حسن کے استعفے کی منظوری کے حق میں  ووٹ دیا۔

پاکستان اولمپکس ایسوسی ایشن کے آئین کے مطابق صدر کے خالی عہدے پر عارضی چارج کے لیے قائم مقام صدر کا انتخاب ہو ا۔ اراکین نے سینیئر ممبر اور پی او اے کے نائب صدر عابد علی قادری کو قائم مقام صدر منتخب کرلیا، ان کے حق میں بھی 23 اراکین نے ووٹ دیے۔

پاکستان اولمپکس ایسوسی ایشن کا کہنا ہے کہ عابد علی قادری اولمپکس ایسوسی ایشن کے اگلے انتخابات تک اس عہدے پر ذمہ داریاں انجام دیں گے۔

یاد رہے کہ پاکستان اولمپکس ایسوسی ایشن کے اگلے انتخابات 2024 کی آخری سہ ماہی میں شیڈولڈ ہیں۔

اس سے قبل عابد علی قادری پاکستان ہینڈ بال فیڈریشن کے سربراہ بھی رہ چکے ہیں اور 2016 میں وہ ڈی کی ایف آئی کی ذمہ داریاں بھی انجام دے چکے ہیں۔ سید عابد علی قادر نے پنجاب پولیس اور آئی بی میں بھی سینیئر عہدوں پر خدمات انجام دی ہیں۔

واضح رہے کہ عارف حسن نے 19 سال تک پاکستان اولمپکس ایسوسی ایشن کی صدارت کے بعد گزشتہ دنوں خرابی صحت کی بنیاد پر استعفی دیا تھا۔