یوٹیلیٹی اسٹورز پراشیائے خوردونوش عام مارکیٹ سے مہنگی فروخت ہونے لگیں۔

بول نیوز کوموصول دستاویز کے مطابق یوٹیلیٹی اسٹورز پر آٹا، ٹوٹا باسمتی چاول، دال چنا، چینی، سفید چنے، سپر باسمتی چاول، سیلا چاول کی عام مارکیٹ سے مہنگے فروخت جاری ہے۔

دستاویزکے مطابق یوٹیلیٹی اسٹورز پرآٹے کا 20 کلو تھیلا عام مارکیٹ سے 26 روپے 43 پیسے مہنگا فروخت ہو رہا ہے، عام مارکیٹ میں 2813 روپے 57 پیسے میں آٹے کا 20 کلو کا تھیلا فروخت ہورہا ہے۔

دستاویز میں بتایا گیا کہ یوٹیلیٹی اسٹورز پر آٹے کا 20 کلو تھیلا 2840 روپے میں دستیاب ہے، ٹوٹا باسمتی چاول یوٹیلیٹی اسٹورز پر عام مارکیٹ سے 9 روپے 3 پیسے مہنگا ہے جبکہ عام مارکیٹ میں ٹوٹا باسمتی چاول فی کلو220 روپے 57 پیسے میں فروخت ہورہا ہے۔

یوٹیلیٹی اسٹورز پر ٹوٹا باسمتی چاول 230 روپے فی کلو دستیاب ہے جبکہ دال چنا عام مارکیٹ سے 4 روپے 73 پیسے اور چینی 11روپے 33 پیسے مہںگی ہے۔ عام مارکیٹ میں چینی 143 روپے 67 پیسے میں فی کلو فروخت ہورہی ہے۔

دستاویزمیں یہ بھی کہا گیا کہ یوٹیلیٹی اسٹورز پر چینی کا فی کلو ریٹ 155 روپے ہے، یوٹیلیٹی اسٹورز پر سفید چنے عام مارکیٹ سے 17 روپے 19 پیسے مہنگے، سپر باسمتی چاول 9 روپے 11 پیسے اورسیلا چاول پر یوٹیلیٹی اسٹورز پرعام مارکیٹ سے 56 روپے 5 پیسے مہنگے ہیں۔