اقوام متحدہ کے سیکرٹری جنرل انتونیو گوتریس نے یو این ایجنسی فار فلسطین پر الزامات کو بے بنیاد قرار دے دیا۔

غیر ملکی خبر رساں ادارے کے مطابق اقوام متحدہ کے سیکرٹری جنرل انتونیو گوتریس کا کہنا ہے کہ اسرائیل نے بے بنیاد الزامات لگائے۔

انہوں نے کہا کہ حماس کے حملوں کو اقوام متحدہ سے جوڑنا حقیقت کے منافی ہے، عالمی برادری غزہ میں متاثرین کی امداد جاری رکھے۔

اقوام متحدہ کے سیکرٹری جنرل کہتے ہیں کہ اگر اقوام متحدہ کا کوئی بھی ملازم دہشت گردی کی کارروائیوں میں ملوث ہوا تو اس کو جوابدہ ہونا ہوگا جب کہ اسے فوجداری مقدمہ کا بھی سامنا کرنا پڑسکتا ہے۔

انتونیو گوتریس نے کہا کہ سیکریٹریٹ ہر طرح سے تعاون کے لیے تیار یے، یو این ایجنسی فار فلسطین میں ہزاروں مرد اور خواتین انتہائی خطرناک حالات میں کام کررہے ہیں۔

خیال رہے کہ اسرائیل نے اقوام متحدہ کے امدای ادارے یو این ایجنسی فار فلسطین کے 12 کارکنان پر اسرائیل پر حملہ کرنے میں ملوث ہونے کا الزام عائد کیا تھا۔

اسرائیل پر حملے کے الزام کے بعد امریکہ نے اقوام متحدہ کے امدادی ادارے کی فنڈنگ روکنے کا اعلان کیا تھا۔

اسکاٹ لینڈ حکومت نے بھی اقوام متحدہ کی امدادی ایجنسی کے لیے نئی فنڈنگ ​​معطل کرنے کا اعلان کیا ہے، علاوہ ازیں برطانیہ، کینیڈا، آسٹریلیا اور جرمنی سمیت 8 ممالک بھی فنڈنگ روکنے کا اعلان کرچکے ہیں۔