مرتضٰی سولنگی کا کہنا ہے کہ پرامن اورشفاف انتخابات کے انعقاد کو یقینی بنایا جائے گا۔ ہم یقین دلاتے ہیں کہ الیکشن پر امن انداز میں ہوں گے۔

نگراں وفاقی وزیراطلاعات مرتضٰی سولنگی نے اسلام آباد میں نیوز کانفرنس کرتے ہوئے کہا کہ دہشتگردی ملک کیلئے نئی نہیں، اس سے ہم دہائی سے گزر رہے ہیں، 2008 میں بھی اور2013 میں الیکشن کے وقت دہشت گردی تھی۔

مرتضیٰ سولنگی نے کہا کہ طالبان کے کابل حکومت سنبھالنے کےبعد دہشتگردی میں اضافہ ہوا، القاعدہ اورٹی ٹی پی افغانستان کو محفوظ پناہ گاہ کے طورپراستعمال کرتے ہیں۔ ہم یقین دلاتے ہیں کہ الیکشن پر امن انداز میں ہوں گے۔

نگراں وفاقی وزیراطلاعات نے کہا کہ انتخابات میں صرف چار دن باقی رہ گئے ہیں، انتخابات کے حوالے سے انتظامات مکمل کرلیے گئے ہیں، پرامن اورشفاف انتخابات کے انعقاد کو یقینی بنایا جائے گا۔

مرتضٰی سولنگی نے کہا کہ پولنگ اسٹیشنزپرسیکیورٹی کےبھرپورانتظامات کیےہیں، انتخابات میں سیکیورٹی کو 3حصوں میں تقسیم کیا گیا ہے، پہلےحصے میں پولیس، دوسرے میں رینجرزاورایف سی ڈیوٹی انجام دینگی۔ ہم غیر ملکی میڈیا کو خوش آمدید کہتے ہیں۔

انھوں نے کہا کہ الیکشن کے حوالے سے پہلے افواہیں تھیں، عام انتخابات اپنے مقررہ وقت پر ہو رہے ہیں، کسی سیکیورٹی کی صورت حال پر فوری ایکشن ہوگا،  ہم آزاد ملک ہیں، تنقید کا حق ہے، کورٹس اور نگراں حکومت پر تنقید کرنے کا حق ہے۔

مرتضیٰ سولنگی نے مزید کہا کہ کسی عدالتی فیصلے پر تنقید کا حق ہے، جمہوریت کے عمل کا تسلسل جاری ہے، پاکستان دنیا میں 5 ویں بڑی جمہوریت بن چکاہے، انتخابات کے حوالےسےاقدامات مکمل کرلیےہیں، 8فروری کو صاف وشفاف انتخابات کیلئےوافروسائل موجودہیں۔

نیوز کانفرنس کے دوران غیرملکی میڈیا کے نمائندوں کے علاوہ الیکشن کمیشن اور وزارت داخلہ حکام بھی شریک تھے۔