پی ایس ایل 9  کے کراچی میں میچز کے لیے فول پروف سیکیورٹی پلان  مرتب کرلیا گیا۔

تفصیلات کے مطابق پاکستان سپر لیگ (پی ایس ایل) کے نویں ایڈیشن کے کراچی میں ہونے والے میچز میں ایس ایس یو کے ایک ہزار مرد اور خواتین کمانڈوز سیکیورٹی کے فرائض انجام دیں گے۔

کل یعنی 28  فروری سے 18 مارچ  تک پی ایس ایل سیزن 9 کے میچز کراچی  کے نیشنل بینک کرکٹ ایرینا (سابقہ نیشنل اسٹیڈیم) میں کھیلے جائیں گے۔

ٹریفک پولیس، اسپیشل برانچ،ریپڈ ریسپانس فورس، ڈسٹرکٹ پولیس اور رینجرز کے اہلکار بھی اس دوران فرائض انجام  دیں گے۔

ایس ایس یو کے ترجمان کا کہنا ہے کہ کمانڈوز کو اسٹیڈیم، پریکٹس گراؤنڈ، کراچی ایئرپورٹ، روٹس، ہوٹلز اور دیگر مقامات پر تعینات کیا جائے گا۔

ترجمان ایس ایس یو نے مزید کہا کہ کرکٹ ٹیموں کے روٹس پر ماہر نشانہ باز بھی تعینات کیے جائیں گے۔

شہریوں کی سہولت کے پیش نظر تمام سڑکوں کو ٹریفک کی آمد ورفت کے لیے کھلا رکھا جائے گا۔

شائقین کرکٹ  کے لیے نیشنل کوچنگ سینٹر سے ملحقہ چائنا گراؤنڈ پارکنگ کے لیے مختص کیا گیا ہے۔

میچ سے تین گھنٹے قبل اسٹیڈیم کے دروازے کھولے جائیں گے،اسٹیڈیم آنے والوں کے لیے اصل شناختی کارڈ ساتھ رکھنا لازم قرار دیا گیا ہے۔