بھارت میں کسانوں کے دہلی چلو مارچ کے باعث نئی دہلی کے داخلی اور خارجی راستے میدان جنگ بن گئے ہیں۔

مودی سرکار کے خلاف ہزاروں بھارتی کسانوں کا مارچ دوبارہ شروع ہوگیا ہے جب کہ بھارتی دارالحکومت نئی دہلی کے داخلی اور خارجی راستے میدان جنگ بن گئے ہیں۔

مودی سرکار نے نئی دہلی کو مکمل طور پر سیل کر دیا جب کہ شہر قلعہ بندی کا منظر پیش کرنے لگا ہے،نئی دہلی کی جانب بڑھنے والے کسانوں پر مودی سرکار نے ڈرون حملے کیے۔

احتجاجی کسانوں پر ڈرونز کی مدد سے آنسو گیس کی شیلنگ کی گئی اور لاٹھی چارج بھی کیا گیا۔ پنجاب و ہریانہ بارڈرز پر ہزاروں کسان ٹریکٹر ٹرالیز کے ساتھ موجود ہیں اور پولیس کے ساتھ جگہ جگہ جھڑپیں جاری ہیں۔

پولیس نے کسانوں کو روکنے کے لئے سڑکیں کھود ڈالیں ہیں اور واٹر کیننز کا بھی استعمال کیا جارہا ہے جب کہ جھڑپوں میں متعدد پولیس اہلکاروں اور کسانوں کے زخمی ہونے کی اطلاع ہے۔

خیال رہے کہ سم یکتا کسان مورچہ اور کسان مزدور مورچہ سمیت 200 سے زائد یونینز دہلی چلو مارچ میں شامل ہیں۔

نجی کمپنیز اور دوستوں کو نوازنے کے لئے مودی سرکار نے کسانوں کو کم سے کم امدادی قیمت کی یقین دہانی کروانے سے انکار کردیا ہے۔

واضح رہے کہ دہلی چلو مارچ میں شامل کسان دھرنے کے لیے کم از کم 6 ماہ کا راشن پانی اور ایندھن لے کے چل رہے ہیں۔