نئی دہلی: مودی سرکار کے خلاف بھارتی کسانوں کا ’دہلی چلو‘ مارچ 11 ویں روز بھی جاری ہے جب کہ بھارتی کسان آج بلیک فرائیڈے منا رہے ہیں۔

غیر ملکی خبر رساں ادارے کے مطابق پنجاب ہریانہ بارڈر پر نوجوان کسان کی ہلاکت کے خلاف کسانوں کا احتجاج مزید شدت اختیار کرگیا ہے۔

سراپا احتجاج بھارتی کسان آج بلیک فرائیڈے منا رہے ہیں جب کہ کسان 26 فروری کو بھارت بھر میں ہائی ویز پر ٹریکٹر ریلیاں بھی نکالیں گے۔

کسانوں نے 14 مارچ کو نئی دہلی کے تاریخی رام لیلا گراؤنڈ میں مہا پنچایت منعقد کرنے کا بھی اعلان کیا ہے۔

خیال رہے کہ کسان مارچ کے دوران ہریانہ میں پرتشدد واقعات کے دوران 2 پولیس اہلکار ہلاک اور 30 سے زائد زخمی ہوچکے ہیں۔

دوسری جانب ہریانہ سرکار نے احتجاج کرنے والے کسان رہنماؤں کے خلاف نیشنل سیکیورٹی ایکٹ کے تحت کارروائی کرنے کا اعلان کیا ہے۔

اپوزیشن کانگریس پارٹی نے صورتحال پر مرکزی پارلیمان کے ساتھ پنجاب اسمبلی کا خصوصی اجلاس بلانے کا بھی مطالبہ کیا ہے۔

یاد رہے کہ دہلی چلو مارچ کے دسویں روز بھی ہریانہ پولیس کی جانب سے کسان مظاہرین پر تشدد جاری رہے جب کہ پنجاب پولیس کی تشدد سے کسان نوجوان ہلاک ہوگیا۔

ہلاک نوجوان شوبھ کرن سنگھ نامی کسان تھا جو کہ پنجاب کے شہر بھٹنڈہ کا رہائشی تھا ، کسان لیڈر کے مطابق بنجاب پولیس پٹیالہ کے شبھ کرن سنگھ کی موت کو ماننے سے انکار کر رہی ہے جب کہ ہسپتال ذرائع کے مطابق گولی لگنے کے باعث شبھ کرن سنگھ کی موت واقع ہوئی۔

بھارتی صحافی کی رپورٹ کے مطابق اس نوجوان کی موت کے بعد مرکزی حکومت اور کسان مظاہرین کے درمیان حالات مزید خراب ہوں گے۔

اپوزیشن جماعتوں نے بھی کسانوں کے مطالبات پر غور کرنے میں ناکامی پر مرکزی حکومت پر شدید تنقید کی ہے۔