کراچی کے سندھ گورنمنٹ اسپتال لیاقت آباد کے ایمرجنسی وارڈ میں سلنڈر دھماکا ہونے سے 7 افراد زخمی ہو گئے۔

تفصیلات کے مطابق ہسپتال کے ایمرجنسی وارڈ میں آگ بھڑک اٹھی جس کے باعث 7 افراد جھلس کر زخمی ہو گئے۔

زخمیوں میں حمزہ ولد سیف اللہ عمر 27 سال، مَہیش ولد ارجن عمر 29 سال، مشرف حسین ولد محمد حسین عمر 55 سال، ستار ولد عزیز احمد عمر 35 سال، آصف ولد عمران عمر 30 سال، کاشی ولد محمود عمر 44 سال اور حسیب ولد عبدالغفار عمر 38 سال شامل ہیں۔

پولیس اور ریسکیو ٹیموں نے موقع پر پہنچ کر مریضوں کو محفوظ مقام پر منتقل کر دیا۔

اسپتال میں ایمرجنسی نافذ کر دی گئی۔

بی ڈی ایس کے مطابق ہسپتال میں شارٹ سرکٹ کے باعث آگ لگی اور اچانک دھماکہ ہوا۔

سندھ گورنمنٹ نے ہسپتال سلنڈر دھماکے کا فوری نوٹس لیتے ہوئے ایس پی لیاقت آباد سے تفصیلات حاصل کیں۔

نگران وزیر صحت سندھ ڈاکٹر سعد خالد نیاز واقعے کا معائنہ کرنے سندھ گورنمنٹ اسپتال لیاقت آباد پہنچ گئے۔