مریم اورنگزیب کا کہنا ہے کہ نوازشریف ہمیشہ ملک میں ترقی اور خوشحالی لائے، ن لیگ اپنے وعدے پورے کرتی ہے۔ 

ترجمان مسلم لیگ ن مریم اورنگزیب نے لاہور میں نیوز کانفرنس کرتے ہوئے کہا کہ پہلے سال میں مہنگائی کو سنگل ڈیجٹ پر لائیں گے، ہم نے ایک کروڑ نوکری دینے کا بندوبست کرکے طریقہ بتایا۔

مریم اورنگزیب نے کہا کہ نوازشریف ہمیشہ ملک میں ترقی اور خوشحالی لائے، آج ہر طرف نفرت پھیلی ہوئی ہے، عوام جانتے ہیں ن لیگ اپنے وعدے پورے کرتی ہے۔

سابق وفاقی وزیر اطلاعات نے کہا کہ شہباز شریف نے ملک کو دیوالیہ ہونے سے بچایا، ن لیگ واحد جماعت ہے جس نے تین نسلوں کا حساب دیا، گالم گلوچ کی سیاست میں عوام کو نقصان پہنچایا گیا۔

مریم اورنگزیب نے کہا کہ 8فروری کو آپ نے ووٹ کا حق استعمال کرنا ہے، ووٹ نے ملک کے مستقبل کا فیصلہ کرنا ہے، ن لیگ نے نوازشریف کی قیادت میں ملک بھرمیں جلسے کیے، نوازشریف نے عوام کی خدمت کی۔