اسلام آباد: قومی اسمبلی کا اجلاس بلانے کے لیے چار تاریخیں تجویز کردی گئیں۔

ذرائع کے مطابق وزارت پارلیمانی امور نے 26 فروری سے 29 فروری کے درمیان قومی اسمبلی کا اجلاس بلانے کی سمری وزیر اعظم آفس کو بھیج دی ہے۔

ذرائع کا کہنا ہے کہ وزارت پارلیمانی امور کی سمری پر نگران وزیر اعظم کسی ایک تاریخ کو قومی اسمبلی اجلاس بلانے کی سمری صدر مملکت کو بھیجیں گے اور صدر مملکت ڈاکٹر عارف علوی وزیر اعظم کی بھیجی گئی سمری پر قومی اسمبلی اجلاس بلانے کی منظوری دیں گے۔

ذرائع نے بتایا کہ قومی اسمبلی کا اجلاس 28 یا 29 فروری کو ہونے کا قوی امکان ہے جب کہ قومی اسمبلی کے اجلاس میں نومنتخب ارکان حلف اٹھائیں گے۔

قومی اسمبلی کے نومنتخب ارکان کے حلف کے بعد اسپیکر اور ڈپٹی اسپیکر کا انتخاب ہوگا جو کہ خفیہ رائے شماری سے کیا جائے گا۔

جب اسپیکر منتخب ہوجائیں گے تو پھر وزیر اعظم کا انتخاب ہوگا جب کہ وزیر اعظم کا انتخاب اوپن ہوگا، وزیر اعظم کے انتخاب میں دونوں امیدواران الگ الگ لابیزمیں جائیں گے۔

وزارت عظمیٰ کے دونوں امیدواران رجسٹر پر حاضری لگا کر اپنے امیدوار کو ووٹ دیں گے، وزیر اعظم کے انتخاب میں پارٹی پالیسی کے خلاف کوئی رکن ووٹ نہیں دے سکتا ہے۔

اگر کسی رکن نے پارٹی پالیسی کی خلاف ورزی کی تو اس کے خلاف پارٹی سربراہ نااہلی کا ریفرنس دائر کرسکتا ہے جب کہ کسی رکن کی طرف سے اپنی پارٹی کے فیصلے کے خلاف دیا گیا ووٹ اس کو نشست سے محروم بھی کرسکتا ہے۔