امریکی وزیر دفاع نے اسرائیلی وزیر دفاع سے ٹیلیفونک کیا جس میں رفح کی صورت حال پر گفتگو ہوئی۔

غیر ملکی خبر رساں ادارے کے مطابق امریکی وزیر دفاع لائیڈ آسٹن نے اسرائیلی ہم منصب یوو گیلنٹ کو رفح میں شہریوں کی حفاظت کی اہمیت پر زور دیا۔

امریکی وزیر دفاع لائیڈ آسٹن نے کہا کہ رفح میں شہریوں کی حفاظت اور انسانی امداد کی نقل و حرکت اور رسائی کو یقینی بنائی جائے۔

دوسری جانب اسرائیلی فوج نے جنوبی غزہ کے علاقے رفح اور خان یونس پر فضائی بمباری کرکے 103 فلسطینیوں کو شہید کردیا جب کہ 145 فلسطینی زخمی ہوگئے۔

خان یونس کے سب سے بڑے صحت مرکز کے اندر پناہ لینے والے 3 افراد کو اسنائپرز نے گولی مار کر شہید کردیا جب کہ 7 دیگر زخمی ہوئے۔

واضح رہے کہ اسرائیلی حملوں کے نتیجے میں اب تک 28 ہزار 576 فلسطینی شہید اور 68 ہزار 146 فلسطینی زخمی ہوچکے ہیں۔

یہ بھی پڑھیں: رفح پر اسرائیلی حملوں کے خلاف جنوبی افریقہ عالمی عدالت پہنچ گیا

خیال رہے کہ فرانسیسی صدر نے رفح میں پناہ لیے لاکھوں فلسطینیوں کے خلاف ممکنہ اسرائیلی فوجی آپریشن کی مخالفت کردی ہے۔

فرانسیسی صدر ایمانوئیل میکرون نے ٹیلیفونک گفتگو میں اسرائیلی وزیر اعظم سے کہا کہ رفح آپریشن عالمی انسانی حقوق کی خلاف ورزی اور علاقائی کشیدگی میں اضافے کا سبب بنے گا۔