ایک تقریب کے دوران ایران کے سپریم لیڈر آیت اللہ خامنہ ای نے مغربی رہنماؤں کو خون کا پیاسا قرار دے دیا ہے۔

غیر ملکی خبر رساں ادارے کی رپورٹ کے مطابق ایک تقریب سے خطاب کرتے ہوئے ایران کے سپریم لیڈر آیت اللہ خامنہ ای نے مغربی رہنماؤں کو 30 ہزار فلسطینیوں کی قتل عام  پر بھیڑیے سے تشبیہ دے دی۔

سلامتی کونسل میں بار بار قرارداد ویٹو کرنے پر انہوں نے امریکہ کو بھی تنقید کا نشانہ بنایا جب کہ ایرانی سپریم لیڈر نے مغربی لیڈروں کی مناقفت اور دوہرے معیار کی مذمت کرتے ہوئے کہا کہ سب خونخوار بھیڑے ہیں۔

علاوہ ازیں انہوں نے اسرائیل کے ساتھ تعلقات برقرار رکھنے والے مسلم ممالک پر تنقید کرتے ہوئے سوال کیا کہ مسلم رہنما قاتل صیہونی حکومت سے اعلانیہ طور پر اپنے تعلقات منقطع اور اس حکومت کی مدد کرنا بند کیوں نہیں کر دیتے؟

واضح رہے کہ سات اکتوبر کو اسرائیل اور حماس کے درمیان جنگ شروع ہونے کے بعد سے ایران کے سپریم لیڈر نے متعدد مواقع پر مسلم ممالک سے اسرائیل سے تعلقات منقطع کرنے کی اپیل کی ہے۔