پاکستان مسلم لیگ (ن) اور پیپلزپارٹی میں حکومت سازی کے لیے معاملات طے پاگئے ہیں جس کے تحت آصف زرداری ملک کے اگلے صدر ہوں گے جب کہ وزارت عظمیٰ کی کرسی پر شہباز شریف بیٹھیں گے۔ 

اسلام آباد میں سابق وزیراعظم شہباز شریف اور سابق صدر آصف زرداری کے ہمراہ  پریس کانفرنس کرتے ہوئے پاکستان پیپلزپارٹی کے چیئرمین بلاول بھٹو زرداری نے کہا کہ  پیپلز پارٹی اور ن لیگ نے حکومت سازی کے لیے نمبرز پورے کرلیے ہیں۔

انہوں نے کہا کہ وزیراعظم کے لیے شہباز شریف دونوں پارٹیوں کے متفقہ امیدوار ہوں گے اور  آصف زرداری صدر مملکت ہوں گے۔

اس سے قبل اسلام آباد میں دونوں جماعتوں کے رہنماؤں کے درمیان ملاقات ہوئی جس میں حکومت سازی سے متعلق امور پر بات چیت ہوئی۔ ملاقات میں بلاول بھٹو، شہباز شریف، اسحاق ڈار ، مراد علی شاہ، قمر زمان کائرہ اور احسن اقبال بھی موجود تھے۔

پاکستان مسلم لیگ ن کی ترجمان مریم اورنگزیب نے ایک بیان میں کہا کہ مسلم لیگ ن اورپیپلز پارٹی کےدرمیان شراکت اقتدارکافارمولاطے پا گیا۔

ذرائع کا کہنا ہے کہ پیپلزپارٹی وفاقی کابینہ کاحصہ نہیں بنے گی، صدرمملکت اورچیئرمین سینیٹ کا عہدہ پیپلزپارٹی کوملے گا جب کہ گورنرپنجاب اور گورنر خیبرپختونخوا بھی پیپلزپارٹی سے ہوں گے۔