حکومت پاکستان کی جانب سے غزہ کے مسلمانوں کے لیے امدادی سامان کی ساتویں کھیپ روانہ کر دی گئی ہے۔

تفصیلات کے مطابق حکومت پاکستان کی جانب سے غزہ کی عوام کے لیے امدادی سامان کی ساتویں کھیپ بذریعہ کارگور بحری جہاز روانہ کر دی گئی ہے۔

سامان روانگی کی تقریب میں پاکستان میں تعینات فلسطینی سفیر، وزارت خارجہ کےحکام، این ڈی ایم اے اور مسلح افواج کے سینئر افسران کراچی کے ساؤتھ ایشیا پورٹ ٹرمینل پر موجود تھے۔

وزارت خارجہ کے مطابق پاکستان کا مظلوم فلسطینی بہن بھائیوں کیلئے امداد کی فراہمی جاری رہے گا، امدادی سامان سید پورٹ مصر پہنچے کے بعد تقسیم کے لیے غزہ روانہ کر دیا جائے گا۔

امدادی سامان کی کھیپ 300 ٹن ضروری اشیاء پر مشتمل ہے جس میں دوائیں، کمبل، اشیاء خوردو نوش اور دیگر ضروری سامان شامل ہے۔

پاکستان کی جانب سے اب تک غزہ کے مصیبت زدہ عوام کے لئے 6 پروازوں کے ذریعے 330 ٹن امدادی سامان روانہ کیا جا چکا ہے۔

پاکستان نے غزہ کے لئے گرم کمبل، خیمے، ادویات،اور کھانے پینے کے اشیاء بھجوائی ہیں۔

وزارت خارجہ کا کہنا ہے کہ پاکستان مشکل کی گھڑی میں فلسطینی بہن بھائیوں کے ساتھ کھڑا ہے اور پاکستان فلسطینیوں کی حمایت و امداد  جاری رکھے گا۔