پاکستان مسلم لیگ ن کے قائد و سابق وزیراعظم نواز شریف نے ووٹ کاسٹ کر دیا۔

مسلم لیگ کے قائد نواز شریف نے ووٹ کاسٹ کر دیا ہے، انہوں نے حلقے این اے 128 ماڈل ٹاؤن میں ووٹ کاسٹ کیا، نواز شریف کے ہمراہ مریم نواز بھی تھیں۔

اس موقع پر نواز شریف نے میڈیا سے گفتگو کرتے ہوئے کہا کہ ہم قربانیاں دیکر یہاں تک پہنچے ہیں، عوام گھروں سے نکلیں اور ووٹ کاسٹ کریں۔

انہوں نے کہا کہ مریم نواز کی جدوجہد پر کوئی شک نہیں، مریم نواز نے مشکل وقت میں پارٹی کا ساتھ دیا۔

مسلم لیگ کے قائد نواز شریف نے مزید کہا کہ ملک میں بدتمیزی اور بدتہذیبی کا کلچر ختم کرنا ہوگا، ان لوگوں نے ہمارے معاشرے میں بگاڑ پیدا کیا، خدا کے واسطے مخلوط حکومت کا نام مت لیں، ملک کے مسائل حل کرنے کیلئے ایک پارٹی کو مینڈیٹ ملنا چاہیے۔

اس سے قبل پاکستان مسلم لیگ (ن) کے صدر شہباز شریف نے حلقہ این اے 128 میں اپنا ووٹ کاسٹ کیا تھا۔

واضح رہے کہ پاکستان بھر میں عام انتخابات 2024 کے لیے کے لیے ووٹنگ جاری ہے، پولنگ اسٹیشنز پر انتخابی عملے نے ذمے داریاں سنبھال لیں، ووٹرز پولنگ اسٹیشن پہنچنا شروع ہوگئے ہیں تاہم پولنگ کا عمل بغیر کسی وقفے کے صبح 8 بجے سے شام 5 بجے تک جاری رہے گا۔

قومی اور چاروں صوبائی اسمبلیوں کے 855 حلقوں کیلئے 12 کروڑ 79 لاکھ سے زیادہ رجسٹرڈ ووٹرز اپنا حق رائے دہی استعمال کریں گے جبکہ ان انتخابات میں ملک کی انتخابی تاریخ میں سب سے زیادہ امیدوار حصہ لے رہے ہیں جن کی تعداد 17 ہزار  سے زائد ہے جن میں 11 ہزار سے زائد آزاد امیدوار ہیں۔

ملک بھر میں 90 ہزار 675 میں سے 46 ہزار 65 پولنگ اسٹیشنز کو حساس و انتہائی حساس قرار دیا گیا ہے جبکہ شفاف پولنگ کے لیے مختلف شہروں میں مانیٹرنگ سیلز قائم کیے گئے ہیں۔