امریکی ریاست فلوریڈا میں بمبارڈیئر چیلنجر 600 سیریز کا طیارہ آئی 75 ہائی وے پر گر کر تباہ ہوگیا۔

قطری خبر رساں ادارے کی خبر کے مطابق امریکی ریاست فلوریڈا میں ایک نجی مسافر طیارہ ایک مصروف شاہراہ پر گر کر تباہ ہو گیا اور زمین پر موجود دو گاڑیوں سے ٹکرا گیا جس کے نتیجے میں دو افراد ہلاک ہو گئے۔

پانچ مسافروں پر مشتمل طیارے کے ہائی وے سے ٹکرانے سے چند لمحے قبل پائلٹ نے پرسکون انداز میں ہوائی اڈے کے کنٹرولر کو بتایا کہ طیارہ رن وے پر نہیں پہنچ پائے گا کیونکہ اس کے دونوں انجن ٹوٹ گئے تھے۔

طیارہ نیپلز کے ہوائی اڈے کے لئے جارہا تھا جب اس نے انٹراسٹیٹ 75 ہائی وے پر ہنگامی لینڈنگ کرنے کی کوشش کی۔

تاہم عینی شاہدین کا کہنا ہے کہ طیارہ ایک گاڑی سے ٹکرا گیا، طیارے کا پر ایک کار کو گھسیٹتے ہوئے دیوار سے ٹکرا گیا۔ اس کے بعد ایک دھماکہ ہوا، جس کے شعلے اور کالا دھواں جائے وقوعہ سے اٹھ رہا تھا۔

کولیئر کاؤنٹی شیرف کے دفتر کے مطابق دو افراد ہلاک ہوئے تاہم فوری طور پر یہ معلوم نہیں ہوسکا کہ ہلاک ہونے والے افراد طیارے میں سوار تھے یا زمین پر موجود کار میں تھے۔

وفاقی حکام نے نیپلز کے قریب پیش آنے والے اس حادثے کی تحقیقات کا آغاز کر دیا ہے، جو اس کے شمال میں واقع فورٹ لاؤڈرڈیل کی طرف جاتا ہے۔

طیارے نے اوہائیو کے شہر کولمبس میں اوہائیو اسٹیٹ یونیورسٹی کے ہوائی اڈے سے دوپہر ایک بجے کے قریب اڑان بھری تھی۔ نیپلز ایئرپورٹ اتھارٹی کے ترجمان رابن کنگ نے بتایا کہ طیارہ حادثے کے وقت نیپلز میں لینڈ کرنے والا تھا جب پائلٹ نے ٹاور سے رابطہ کیا اور ہنگامی لینڈنگ کی درخواست کی۔