خیبرپختونخوا اسمبلی کی مخصوص نشستوں پر حلف برداری کے معاملے پرعدالت نے فریقین سے چاردن جواب طلب کرلیا۔

پشاورہائی کورٹ کے جسٹس شکیل احمد اور جسٹس صاحبزادہ پر مشتمل دو رکنی بینچ نے سماعت کی۔ سماعت کے دوران عدالت نے فریقین کو ابتدائی نوٹس جاری کرتے ہوئے چار دن میں جواب طلب کرلیا۔

جسٹس شکیل احمد نے ریماکس دیے کہ قانون کی بالادستی ہونی چاہئیے، سیاسی معاملات پر سیاست ہونی چاہئیے، افسوس ہو رہا ہے کہ ہم کہاں پرہیں اور ہمارے پڑوسی کہاں؟ ملک کی معشیت کا حال کیا ہے؟ آئی ایم ایف کی شرائط دیکھیے تو مزید سختیاں آنے والی ہے۔

انھوں نے اپنے ریمارکس میں کہا کہ ایک جماعت جب حکومت میں ہوتی ہے تو رویہ الگ ہوتا ہے اور دوسری جانب جاتے ہی تبدیل ہو جاتا ہے، اس مخصوص نشستوں پر تو لارجر بینچ فیصلہ کرچکا ہے۔

درخواست گزار وکیل نے مؤقف اپنایا کہ گورنر نے آرٹیکل 109 کا اختیار استعمال کر کے حلف کے لیے اسمبلی اجلاس طلب کیا ہے، جس پرجسٹس شکیل احمد نے کہا کہ کیا آج اجلاس نہیں ہو رہا ہے؟

وکیل درخواست گزارنے جواب دیا کہ اسمبلی کی پریس ریلیزآئی ہے کہ آج اجلاس نہیں ہو رہا ہے، عدالت نے کیس کی سماعت 26 مارچ تک سماعت ملتوی کردی۔